Расійскія генералы трэці месяц запар кідаюць армію ў рэкордную колькасць «мясных штурмаў»
- 3.08.2026, 18:48
Штурмы ўзмацніліся пасля абяцання Пуціну да канца года захапіць Данбас.
Колькасць «штурмавых дзеянняў» расійскай арміі ва Украіне ў ліпені трэці месяц запар устанавіла рэкорд, вынікае з падлікаў украінскага OSINT-праекта DeesState.
Паводле яго даных, у мінулым месяцы 8 тысяч разоў генералы накіравалі армію РФ на штурм украінскіх пазіцый. Колькасць «штурмавых дзеянняў» павялічылася прыкладна на 11% у параўнанні з чэрвенем, на 14% — у параўнанні з маем і на 60% адносна зімы і пачатку вясны.
У сярэднім штодня расійскія падраздзяленні здзяйснялі 258 штурмаў супраць 167 у студзені–красавіку, вынікае з падлікаў DeepState. Нягледзячы на гэта, прасоўванне войскаў РФ працягвала стагнаваць: у мінулым месяцы яны павялічылі тэрыторыю пад сваім кантролем усяго на 88 кв км, за месяц да таго — на 57 кв км, а май завяршылі чыстымі стратамі тэрыторый на 11 кв км. Для параўнання: у студзені–красавіку расійская армія захоплівала 126–245 кв км, а напрыканцы мінулага года — каля 500 кв км.
Расійскае вайсковае кіраўніцтва спяшаецца: паводле слоў крыніц Bloomberg, набліжаных да Крамля, генералы Генштаба паабяцалі прэзідэнту Уладзіміру Пуціну, што да канца года змогуць цалкам захапіць Данецкую вобласць, дзе па-ранейшаму застаецца каля 17% тэрыторыі, не падкантрольнай РФ, уключаючы 50-кіламетровы пояс гарадоў-крэпасцяў — Канстанцінаўка, Дружкаўка, Славянск і Краматорск. Шэраг расійскіх вайскоўцаў, аднак, лічаць названыя Пуціну тэрміны нерэалістычнымі і мяркуюць, што вайна за Данбас расцягнецца да 2027 года, казалі крыніцы Bloomberg.
Нават максімальныя тэмпы расійскага наступлення, якія цяпер фіксуе статыстыка, не дазваляюць арміі Пуціна ў агляднай будучыні захапіць Данецкую вобласць, лічыць вайсковы аналітык Ян Матвееў. «Калі ўзгадаць, якія страты нясе армія Расіі дзеля такіх сціплых дасягненняў і што адбываецца ў тыле, стане ясна, што гэта дарога ў адзін канец — у бездань», — дадае ён.
Нягледзячы на стагнуючае наступленне, масаванае прымяненне дронаў і далёкабойныя ўдары па расійскай тэрыторыі, паводле слоў крыніц Bloomberg, Пуцін працягвае верыць, што выйграе вайну, і замест саступак толькі ўзмацняе свае патрабаванні. Як сцвярджалі крыніцы агенцтва, Пуцін лічыць, што ЗША парушылі дамоўленасці Анкарыджа і больш не згодны толькі на адну Данецкую вобласць, а хоча поўны кантроль над астатнімі анексаванымі ў 2022 годзе рэгіёнамі Украіны — Запарожскай і Херсонскай вобласцямі. Луганская вобласць ужо знаходзіцца пад амаль 100-працэнтным расійскім кантролем.