Польскі плывец упершыню ў гісторыі пераплыў Балтыйскае мора

• 3.08.2026, 19:01

У вадзе ён правёў амаль 55 гадзін.

Польскі плывец Бартош Кубкоўскі увайшоў у гісторыю, стаўшы першым чалавекам, які пераадолеў маршрут праз Балтыйскае мора ўплаў са Швецыі ў Польшчу, піша eurosport.tvn24.pl.

Пераадолеўшы больш за 160 кіламетраў, змагаючыся з марскімі ўмовамі, стомай і ўласнымі фізічнымі межамі, Кубкоўскі праплыў ад шведскай вёскі Косеберга да польскага ўзбярэжжа ў горадзе Дзівнаў. Увесь шлях заняў у яго крыху менш за 55 гадзін.

Заплыў стартаваў у пятніцу, 31 ліпеня 2026 года. З самага пачатку яму давялося сутыкнуцца з вельмі складанымі ўмовамі. На працягу ўсяго заплыву ён не мог спаць і яму было забаронена датыкацца да суправаджальнай лодкі. Ежу і ваду перадавалі яму з судна толькі з дапамогай спецыяльнага шоста. Гэта была не толькі бітва з морам, але і выпрабаванне магчымасцяў яго цела.

Для Кубкоўскага гэты поспех мае асаблівае значэнне, бо гэта была яго пятая спроба перасекчы Балтыйскае мора. Папярэднія спробы заканчваліся няўдала, хоць кожны раз спартовец набліжаваўся да мэты.

Найбольш драматычная спроба была ў 2025 годзе. Тады плывец правёў у вадзе больш за 52 гадзіны і амаль дасягнуў поспеху. Ён пераадолеў большую частку маршруту, усталяваўшы асабістыя рэкорды, але быў вымушаны спыніцца ўсяго за 11 кіламетраў да фінішу. Моцнае знясіленне і пагаршэнне надвор'я не дазволілі яму завяршыць заплыў.

На гэты раз Кубкоўскі вытрымаў шматгадзіннае напружанне і выканаў задачу, якая доўгі час здавалася амаль невыканальнай. Аднак нават на фінішы яму давялося пераадольваць крызіс. Калі да берага заставалася каля 1500 метраў, плывец ненадоўга спыніўся ў вадзе і пачаў пытацца ў каманды падтрымкі, колькі яшчэ засталося. Ён не бачыў берага і страціў упэўненасць. Тады члены каманды падтрымалі яго словамі пра тое, што на пляжы ўжо бачны натоўп людзей. Гэта дапамагло яму сабраць апошнія сілы і завяршыць заплыў.

У той жа час іншая польская спартсменка, Кароліна Шчэпаняк, таксама пераплывала Балтыйскае мора. Яна абрала іншы маршрут і накіроўвалася да пляжу ў вёсцы Паберава. Яна правяла ў вадзе 58 гадзін, але ў выніку яе спроба скончылася няўдачай.