Румынскія вайскоўцы падарвалі скалу ў Дунаі для астуджэння АЭС «Чэрнаводэ»

• 3.08.2026, 21:14

Відэафакт.

Вайскоўцы Румыніі выкарысталі каля 180 кг выбухоўкі для падрыву падводнай скалы ў рэчышчы Дунаю, каб павялічыць прыток вады да адзінай у краіне атамнай электрастанцыі «Чэрнаводэ», перадае Bloomberg.

З-за засухі і абмялення ракі кампанія Nuclearelectrica раней спыніла адзін з двух рэактараў станцыі. Выконваючы абавязкі міністра абароны Румыніі Раду Міруцэ паведаміў, што кіраваны выбух правялі для расчышчэння рэчышча і перанакіравання вады ў асноўны канал, які падае ваду на АЭС.

«Мы вельмі блізкія да дасягнення мінімальнага ўзроўню вады, неабходнага для бяспечнага астуджэння ядзернага абсталявання, і робім усё магчымае, каб павялічыць патокі вады, што паступаюць на атамную электрастанцыю», — сказаў Міруцэ.

АЭС «Чэрнаводэ» была спраектаваная канадскай кампаніяй Atomic Energy of Canada Limited у 1980-х гадах і ўведзеная ў эксплуатацыю ў 1996 годзе. Гэта адзіная атамная электрастанцыя Румыніі з двума энергаблокамі магутнасцю па 700 МВт, якая забяспечвала каля 18% спажывання электраэнергіі ў краіне.