У Лукашэнкі пачаўся старэчы маразм?
- 4.08.2026, 7:47
Указы дыктатара ўсё «цудней і цудней».
На Гродзеншчыне плануюць накіраваць у армію некалькі дзясяткаў работнікаў, якія дрэнна сябе праявілі падчас жніва. Аб гэтым паведаміў старшыня Гродзенскага аблвыканкама Юрый Караеў.
Паводле слоў Караева, тых, хто прыдатны да службы са зброяй, могуць накіраваць, як раней і патрабаваў Аляксандр Лукашэнка, бліжэй да паўднёвай мяжы Беларусі. Іншых плануюць выкарыстоўваць у інжынерных падраздзяленнях для выканання абарончых работ — пераносіць шпалы, капаць, укладваць рэйкі або займацца будаўніцтвам дарог.
Нагадаем, Лукашэнка распарадзіўся адпраўляць у армію тых, хто дрэнна працуе і не выконвае працоўную дысцыпліну ў сельскай гаспадарцы.
«Ну чаго мы будзем пры дэфіцыце кадраў наручнікі надзяваць? Папрасіце Хрэніна (міністр абароны Віктар Хрэнін. — Заўв. рэд.), маё даручэнне яму перадайце: усіх, хто не ўмее працаваць, — у армію і на паўднёвую мяжу. У лес. Там нашы хлопцы, сілы спецыяльных аперацый, па маім загадзе размешчаныя ўздоўж украінскай мяжы. Гэта не значыць, што мы на кагосьці [збіраемся] нападаць. Мы ні на каго не нападаем, мы забяспечваем сваю бяспеку. Нялёгка — камарыкі, мухі, мошкі і іншае. Вось туды іх, у армію. Звычайнымі салдатамі. Тыдзень падрыхтоўкі (гранатамёт, кулямёт) — і туды, у распараджэнне сіл спецыяльных аперацый», — заявіў дыктатар 21 ліпеня.
Шаленства Лукашэнкі нарастае
Палітолаг Валерый Карбалевіч лічыць, што з гадамі кіраўнік усё больш адрываецца ад рэальнасці:
«Шмат ідэй выклікаюць пытанні: навошта будаваць яшчэ адну АЭС або энергаблок, калі ў краіне лішак электраэнергіі? Навошта будаваць завод па вытворчасці халадзільнікаў, калі мінскі «Атлант» не ведае, куды дзяваць сваю прадукцыю? Навошта будаваць цэлюлозна-папяровы камбінат у Віцебскай вобласці, калі Светлагорскі цэлюлозна-кардонны камбінат з'яўляецца стратным, не мае дастатковых і стабільных рынкаў збыту?
Шмат разоў ён звяртаецца да адных і тых жа пытанняў (бесгаспадарчасць на сельгаспрадпрыемствах, дохнуць цяляты), лёсу адных і тых жа прадпрыемстваў («Камволь»), дае загады ўсё выправіць, але дзесяцігоддзямі нічога не змяняецца. Лукашэнка збірае новыя нарады, аддае тыя ж самыя загады з аднолькавымі вынікамі — нулявымі. Здавалася б, варта спыніцца і падумаць, чаму гэта не працуе. Але не. Прычыны няўдач ён бачыць у дрэннай дысцыпліне».
На абсурднасць ідэі Лукашэнкі ўказвае і эканаміст Андрэй Махоўскі:
«Проста ацаніце прыгажосць гульні. Аграрыяў — у армію. Вайскоўцаў — на палі. Сялян, якія не хочуць добра працаваць, — мяняем на людзей, якія ў прынцыпе не хочуць працаваць.
І галоўнае, што ўсе пры справе. Чыноўнікі, армія, міліцыя — усе мітусцяцца. Спісы складаюцца, усе працоўныя і непрацоўныя рэсурсы перамяшчаюцца, справаздачы пішуцца, прэміі выпісваюцца. Ну прыгажосць жа!
Праўда, калі высветліцца, што з-за гэтых геніяльных ракіровак з ураджаем або вайсковай падрыхтоўкай нешта пайшло не так, адказваць будзе не аўтар ідэі.
Адказваць будуць тыя, хто ўвасабляў яе ў жыццё, бо аўтар ідэі ні за што адказваць не прывучаны. Ён толькі ўмее шукаць вінаватых».