У беларускім заказніку зрабілі знаходку сусветнага маштабу

• 4.08.2026, 10:28

Рэдкі лішайнік раней знаходзілі толькі ў некалькіх месцах планеты.

У заказніку «Буда-Кашалёўскі» ў Гомельскай вобласці навукоўцы выявілі рэдкі лішайнік Chaenothecopsis oregana, які раней у краіне не сустракаўся, паведамілі ў Інстытуце эксперыментальнай батанікі НАН Беларусі. Від унесены ў Чырвоны спіс Міжнароднага саюза аховы прыроды (МСАП) як уразлівы.

Знаходка здзівіла даследчыкаў не толькі самім фактам выяўлення, але і маштабам папуляцыі. На адным дубе спецыялісты налічылі каля 400 пладавых целаў лішайніка.

Паводле ацэнак навукоўцаў, беларуская папуляцыя можа аказацца адной з найбуйнейшых у свеце.

Упершыню Chaenothecopsis oregana быў апісаны ў 2003 годзе ў амерыканскім штаце Арэгон. Пазней яго знаходзілі ў Іспаніі, Швейцарыі, Латвіі і Эстоніі. Усяго на сёння вядома каля 20 месцаў росту гэтага віду, прычым большасць з іх знаходзіцца ў ЗША.