Астраномы паказалі ўнікальны здымак Сусвету

• 4.08.2026, 10:42

Найбуйнейшая лічбавая камера зазірнула на мільярды гадоў у мінулае.

Абсерваторыя імя Веры Рубін пачала 10-гадовае даследаванне космасу з выкарыстаннем 3,2- гігапіксельнай лічбавай камеры.

Астраномы паказалі новы фотаздымак добра вывучанага ўчастка Сусвету, але са значна большай дэталізацыяй, чым раней, зроблены Абсерваторыяй імя Веры Рубін. На выяве паказаныя больш за 650 000 галактык і больш за 50 000 зорак, піша Gizmodo.

Абсерваторыя імя Веры Рубін, якая знаходзіцца на вяршыні гары Серро-Пачон у Чылі, абсталяваная найбольшай у свеце 3,2-гігапіксельнай лічбавай камерай і 8,4-метровым тэлескопам. Абсерваторыя зрабіла першую выяву космасу ў чэрвені 2025 года і нядаўна распачала 10-гадовы агляд Сусвету. Магутная камера павінна дапамагчы стварыць найбуйнейшы ў гісторыі астранамічны фільм, які дасць выявы космасу ў найвышэйшым дазволе. Дзякуючы велізарнаму полю зроку і глыбіні рэзкасці Абсерваторыя імя Веры Рубін дапаможа зрабіць адкрыцці, звязаныя з цёмнай матэрыяй, цёмнай энергіяй, а таксама іншымі з'явамі і аб'ектамі, якія адыгрываюць важную ролю ў эвалюцыі Сусвету.

Астраномы прадставілі фотаздымак ўчастка Сусвету, вядомага як поле COSMOS, на якім зафіксавана больш за 650 000 галактык і больш за 50 000 зорак, сабраных на адной выяве. Гэты фотаздымак дазваляе больш дэталёва разгледзець адзін з найбольш вывучаных участкаў космасу.

Поле COSMOS утрымлівае больш за 2 мільёны галактык, што ахопліваюць 75% узросту Сусвету, прычым некаторыя з іх знаходзяцца на адлегласці да 12 мільярдаў светлавых гадоў ад нас. Гэты ўчастак космасу з'яўляецца ідэальным месцам для назіранняў, бо ён скіраваны ўбок ад плоскасці Млечнага Шляху, запоўненай шматлікімі зоркамі, а таму дае магчымасць убачыць далёкія закуткі Сусвету.

Поле COSMOS займае вобласць неба, прыблізна ў тры разы большую за памер поўнага Месяца. Накіроўваючы тэлескопы на гэты ўчастак неба, астраномы могуць убачыць вялікую колькасць далёкіх галактык, святло якіх ляцела да нас мільярды гадоў.

Тэлескоп Абсерваторыі імя Веры Рубін зафіксаваў розныя галактыкі, уключаючы спіральныя, эліптычныя, скажоныя, што зліваюцца, галактыкі і цьмяныя чырвоныя галактыкі з далёкага Сусвету.