У Расіі пачалі сотнямі закрывацца АЗС

• 4.08.2026, 11:23

Праз паліўны крызіс.

У Расіі на фоне паліўнага крызісу, які ахапіў амаль усе рэгіёны, пачалі сотнямі закрывацца аўтазаправачныя станцыі (АЗС). Са студзеня па жнівень спынілі працу і сышлі на рамонт 322 станцыі, што на 70% больш, чым за той жа перыяд мінулага года. Усяго закрыцці закранулі 1,2% ад агульнай колькасці дзеючых у краіне заправачных станцый (28,4 тыс.). Пра гэта сведчаць дадзеныя «ОМТ Консалт», якія прыводзіць «Известия».

Большасць АЗС, што спынілі працаваць, — 105 станцый — належаць буйным незалежным сеткам, такім як «Газойл», «Росгаз», «Звезда», Tamic Energy і ММК Petrol. Сярэднія і дробныя сеткі заправак закрылі 69 і 82 АЗС адпаведна. Вертыкальна інтэграваныя нафтагазавыя кампаніі (ВІНК) — «Лукойл», «Татнефть», «Газпромнефть», ННК, «Роснефть», «Сургутнефтегаз» і «Газпром» — часова спынілі працу 67 станцый. Пры гэтым, як адзначылі ў «ОМТ Консалт», яшчэ 214 АЗС застаюцца на рамонце з мінулага года.

Крызіс на паліўным рынку Расіі ўзнік з-за атак украінскіх беспілотнікаў на нафтаперапрацоўчыя заводы (НПЗ). Далёкабійныя ўдары ў гэтым годзе вывелі з ладу 26 прадпрыемстваў. Паводле стану на канец ліпеня толькі 8 змаглі вярнуцца да паўнавартаснай працы, не менш за 11 аднавілі вытворчасць часткова, а 7 працягвалі прастойваць, піша The Moscow Times.

У выніку, паводле ацэнкі EA Analytics, нафтаперапрацоўка ў Расіі ўпала да самага нізкага ўзроўню з мая 2002 года — 3,6 млн барэляў у суткі. Гэта прыкладна на траціну ніжэй за сезонную норму: у 2020–2025 гадах расійскія НПЗ у сярэднім перапрацоўвалі летам 5,3–5,6 млн барэляў у суткі.

На гэтым фоне рэгіёны Расіі ад Сібіры да Калінінграда ахапіў дэфіцыт паліва. На АЗС увялі ліміты на продаж паліва ў адны рукі, а частка станцый была вымушаная прыпыняць працу. Сярэдні біржавы кошт АІ-92 па выніках першай паловы 2026 года дасягнуў 63,7 тыс. руб. за тону, павялічыўшыся на 18% у параўнанні з мінулым годам.

Расійскі паліўны саюз у лісце ўраду скардзіўся, што прыватныя АЗС не могуць купіць паліва па прымальных цэнах, а набытую на біржы сыравіну ім не пастаўляюць, бо нафтавыя кампаніі ў першую чаргу забяспечваюць палівам уласныя станцыі. Недаступнасць бензіну для незалежных сетак захоўваецца дагэтуль і прыводзіць да закрыццяў АЗС, адзначыў прэзідэнт саюза «Нафтавы клуб Санкт-Пецярбурга» Марат Муртазін.

У сваю чаргу ўладальнікі закрытых АЗС пачалі актыўна выстаўляць іх на продаж, раней пісалі «Известия». Цэны на станцыі вагаюцца ад 1 млн да 150 млн руб. Пры гэтым далейшая сітуацыя з запраўкамі будзе залежаць ад даступнасці і кошту паліва, рэзюмаваў Муртазін.