Жыхары элітных таўнхаусаў у Брэсце захапілі дзіцячую пляцоўку

• 4.08.2026, 14:10

Суседскіх дзяцей выганяюць з тэрыторыі агульнага карыстання.

На тэрыторыі жылога комплексу Скандынаўскае прадмесце ў Брэсце разгарнулася сапраўдная драма з-за дзіцячай пляцоўкі. Гісторыю шматгадовай спрэчкі жыхароў элітных таўнхаусаў з суседзямі распавёў берасцеец Павел у Threads.

Па словах мужчыны, дзіцячая пляцоўка каля дамоў пад нумарамі 83 і 85 на вуліцы Верасовай агароджаная плотам ужо шмат гадоў, на ёй ёсць таблічка з надпісам «Вядзецца будаўніцтва», аднак ніякай тэхнікі або пашпарта аб’екта з інфармацыяй пра будаўніцтва няма. Затое на тэрыторыі пляцоўкі ляжаць дзіцячыя цацкі, якія, відаць, пакінулі дзеці з бліжэйшых дамоў.

Згодна з кадастравай картай, тэрыторыя пляцоўкі — грамадская, адносіцца да Ленінскага раёна і не належыць уласнікам дамоў ЖК. Аднак жыхары таўнхаусаў выганяюць суседскіх дзяцей, якія прыходзяць на пляцоўку пагуляць.

За самавольнае заняцце зямельнага ўчастка адказнай асобе (ці асобам) пагражае штраф ад 450 да 1350 рублёў.