Армія робатаў змяняе правілы вайны ва Украіне

• 4.08.2026, 16:02

ЗСУ робяць стаўку на машыны.

Украіна паскарае ўкараненне наземных беспілотных платформаў, разлічваючы кампенсаваць недахоп асабовага складу і знізіць страты на фронце. Сёння ў войсках выкарыстоўваюцца самыя розныя робатызаваныя комплексы — ад транспартных машын да платформаў з кулямётамі, агнямётамі і ўдарнымі зарадамі, піша Bloomberg (пераклад — сайт Charter97.org).

Баявыя робаты ужо выкарыстоўваюцца у рэальных аперацыях. На Добрапольскім напрамку адна з платформаў з дапамогай агнямёта падпаліла сухую траву, сарваўшы прасоўванне расійскіх падраздзяленняў. Іншы робат — Wolly 7.62 — быў дастаўлены марскім беспілотнікам на Кінбурнскую касу, адкрыў агонь па расійскіх вайскоўцах, а пасля выканання задачы самаліквідаваўся.

Украінскія ўлады маюць намер выпусціць не менш за 50 тысяч наземных беспілотнікаў ужо ў гэтым годзе. Паводле слоў вайскоўцаў, такія сістэмы бяруць на сябе дастаўку боепрыпасаў, эвакуацыю параненых, мінаванне, выведку і ўдарныя місіі. «Яны дазваляюць паменшыць страты ў зоне паражэння глыбінёй да 25 кіламетраў», — адзначаюць аўтары.

«Кіеў таксама паведаміў пра першы паспяховы захоп варожай пазіцыі, праведзены выключна з выкарыстаннем паветраных і наземных беспілотнікаў, без удзелу пяхоты», — піша Bloomberg..

На гэтым фоне ўзмацняецца тэхналагічнае суперніцтва паміж бакамі канфлікту. Расія ўдасканальвае ўдарныя беспілотнікі і сістэмы навядзення па аптавалаконным кабелі, тады як Украіна стварае адзіную сетку сэнсараў і робатызаваных платформаў, якая ўжо атрымала высокія ацэнкі амерыканскіх ваенных спецыялістаў.

«Гэтыя платформы павінны дапаўняць пяхоту, а не выцясняць яе», — лічаць вытворцы. Сучасныя машыны здольныя перавозіць да 150 кілаграмаў грузу на адлегласць каля 15 кіламетраў, а іх вытворчасць ужо вырасла ад адзінкавых узораў да тысяч экзэмпляраў.