Пракрамлёўская газета абвінаваціла патрыярха Кірыла ў «абагаўленні» атамнай бомбы

• 4.08.2026, 16:24

У РПЦ убачылі пераход да ідэалогіі «атамнага праваслаўя».

Пракрамлёўская расійская газета «Маскоўскі камсамолец» апублікавала крытычную калонку аб пропаведзі кіраўніка РПЦ — патрыярха Кірыла, які назваў стварэнне савецкай атамнай бомбы «ласкаю і міласцю Божай», піша «Агенцтва».

Матэрыял выйшаў пад загалоўкам «Атамнае праваслаўе: патрыярх «абагаўляе» ядзерную бомбу і заклікае не баяцца «апакаліптычных сцэнароў»». Яго аўтар звяртае ўвагу на рэзкую змену поглядаў кіраўніцтва РПЦ і дзіўнасць узвялічвання зброі масавага знішчэння хрысціянскім дзеячом.

У калонцы адзначаецца, што ніхто з папярэднікаў Кірыла не гаварыў пра атамную зброю з такім захапленнем. Калі разглядаць яго выступленне як прамову дзяржаўнага палітыка, яна ўпісваецца ў крэмлёўскую логіку. Аднак з багаслоўскага пункту гледжання заявы кіраўніка РПЦ выглядаюць супярэчлівымі.

Аўтар нагадвае, што атамная бомба ўпершыню з’явілася ў ЗША, а савецкі ядзерны праект у многім абапіраўся на інфармацыю, атрыманую ад удзельнікаў амерыканскага «Манхэтэнскага праекта».

Акрамя таго, раней сама РПЦ ставілася да ядзернай зброі зусім інакш. У пасланні Свяшчэннага Сінода 1986 года гаварылася пра заганнасць палітыкі ядзернага запалохвання і неабходнасць пазбавіць свет ад зброі масавага знішчэння.

Цяпер жа кіраўніцтва царквы не толькі абвяшчае савецкую атамную бомбу Божым цудам, але і заклікае вернікаў не баяцца магчымай ядзернай вайны.

«Магчыма, гаворка тут ужо ідзе пра нейкую зусім іншую сістэму поглядаў і каштоўнасцяў», — піша аўтар, называючы гэтую ідэалогію «атамным праваслаўем».

Патрыярх Кірыл выступіў са скандальнай пропаведдзю 1 жніўня пасля літургіі ў Свята-Троіцкім Серафіма-Дзівеевскім манастыры. Ён заявіў, што стварэнне атамнай бомбы савецкімі навукоўцамі адбывалася ў тым ліку дзякуючы малітвам Серафіма Сароўскага.

Паводле слоў кіраўніка РПЦ, праз працу навукоўцаў, інжынераў і рабочых над краінай нібыта «з’явіліся ласка і міласць Божая».

«Маскоўскі камсамолец» лічыцца адным з найбуйнейшых расійскіх выданняў і вельмі рэдка выступае з прамой крытыкай прадстаўнікоў крэмлёўскай улады і кіраўніцтва РПЦ.