Мінск стаў самым папулярным замежным горадам для расійскіх турыстаў

• 4.08.2026, 19:09

У параўнанні з мінулым летам колькасць браніраванняў размяшчэння ў нашай сталіцы павялічылася на 14%.

Мінск летам 2026 года стаў самым папулярным замежным горадам для арганізаваных турыстаў з Расіі. Пра гэта сведчыць даследаванне сэрвісу браніравання «Ostrovok B2B», які прааналізаваў заказы турагенцтваў на чэрвень—жнівень.

У параўнанні з мінулым летам колькасць браніраванняў размяшчэння ў беларускай сталіцы павялічылася на 14%. Акрамя таго, у дзясятку самых запатрабаваных расіянамі гарадоў для пазнавальнага турызму ўвайшлі Ерэван, Тбілісі, Алматы, Астана, Гродна, Ташкент, Брэст, Баку і Віцебск. У цэлым кожнае другое замежнае браніраванне расійскіх турагентаў гэтым летам прыпадае на краіны былога СССР.

На думку прадстаўнікоў кампаніі, Беларусь узначаліла рэйтынг дзякуючы добрай транспартнай даступнасці, адсутнасці складанасцяў з аплатай, развітай турыстычнай інфраструктуры і магчымасці падабраць адпачынак на любы бюджэт.

Сярод далёкіх замежных напрамкаў найбольшую папулярнасць у расіян набіраюць краіны Азіі. Лідарам гарадскога турызму стаў Шанхай, дзе колькасць браніраванняў вырасла на 27%. Высокім попытам таксама карыстаюцца Пекін, Гуанчжоу, Токіа і Бангкок. Рост цікавасці да Кітая тлумачаць бязвізавым рэжымам і пашырэннем прамых авіязносін паміж расійскімі гарадамі і кітайскімі мегаполісамі.

У сегменце пляжнага адпачынку першае месца ў расіян заняў Батумі, дзе колькасць браніраванняў павялічылася ў 1,4 раза. Запатрабаванымі таксама застаюцца курорты Абхазіі — Гагры, Сухумі, Новы Афон і Піцунда. Сярод іншых папулярных месцаў для адпачынку расійскія турысты выбіраюць турэцкія курорты Анталью, Аланію і Кемер, а таксама в'етнамскія Нячанг і Дананг і тайскія Патаю і Пхукет.