Рынак новых аўтамабіляў у Беларусі набліжаецца да гістарычнага рэкорду
- 4.08.2026, 19:51
Вынікі ліпеня.
Рынак новых легкавых аўтамабіляў у Беларусі не проста аднавіўся пасля чэрвеньскага падзення, але і прадэманстраваў упэўнены рост, паведамілі ў Беларускай аўтамабільнай асацыяцыі (БАА).
За ліпень было рэалізавана 9,6 тыс. новых аўтамабіляў — гэта месячны максімум за 2026-ы. Ліпеньскі вынік на 30% большы, чым у папярэднім месяцы, і на 18,5% перавысіў майскі паказчык. І рынак развіваецца мацней, чым прагназавалі эксперты.
Асноўныя фактары росту — аўтамабілі лакальнай вытворчасці і сегмент электрамабіляў.
СЗАТ «БелДжы» па выніках ліпеня рэалізавала 5,3 тыс. аўтамабіляў пад брэндамі Belgee і Geely. Гэта новы рэкорд прадпрыемства за ўсю гісторыю продажаў. На гэтыя аўто прыпала больш за 55% усяго рынку.
Яшчэ адным значным гульцом становіцца другі беларускі аўтазавод СП ЗАТ «Юнісон». За ліпень ён рэалізаваў 596 аўтамабіляў — гэта каля 6,2% рынку новых аўтамабіляў.
«Такім чынам, продажы другога аўтазавода перастаюць быць нішавым фактарам і становяцца прыкметным элементам развіцця рынку. Сумарна на аўтамабілі, рэалізаваныя двума беларускімі аўтазаводамі, прыпала больш за 61% ліпеньскага рынку», — адзначылі ў асацыяцыі.
Аднавіўся пасля чэрвеня і рынак у цэлым, і яго асобны сегмент электрамабіляў. У ліпені прадалі 3,5 тыс. новых электрамабіляў, што на 46% больш, чым у папярэднім месяцы.
Доля «электрычак» у структуры рынку склала каля 36,5%.
«Відавочна, што рынак новых легкавых аўтамабіляў сёлета мае ўсе шанцы пераадолець мяжу ў 70 тысяч, усталяваўшы абсалютны рэкорд за ўсю гісторыю яго існавання ў краіне», — адзначыў член праўлення БАА Сяргей Варывода.
Па яго словах, рынак «разагрэты» імклівым ростам аб'ёмаў спажывецкага крэдытавання беларускіх тавараў аўтамабільнай прамысловасці, нізкімі цэнамі на электрамабілі і ажыятажным попытам на «электрычкі» напярэдадні вычарпання квоты на ўвоз без сплаты мытнай пошліны.
Варывода лічыць, што ў бліжэйшыя гады за рынак новых машын у краіне будуць змагацца мясцовыя аўтавытворцы транспартных сродкаў з рухавікамі ўнутранага згарання, а таксама імпарцёры і вытворцы электрамабіляў.