На Кубе адбыўся другі блэкаут за суткі

• 4.08.2026, 23:31

І шосты з пачатку года.

Нацыянальная энергасістэма Кубы выйшла з ладу ў панядзелак, 3 жніўня, другі раз менш чым за суткі і ў шосты раз з пачатку года, што прывяло да адключэння электраэнергіі па ўсёй краіне. «Прычынай збою сталі ваганні напружання», — цытуе агенцтва Reuters журналіста кубінскага дзяржаўнага тэлебачання Лазара Мануэля Алонса.

Дзяржаўная энергетычная кампанія Union Electrica de Cuba (UNE) пазней удакладніла, што неспрыяльныя пагодныя ўмовы паўплывалі на сетку перадачы электраэнергіі падчас аднаўленчых работ, пры гэтым былі непасрэдна закранутыя энергаблокі, якія раней ужо былі ўведзеныя ў эксплуатацыю. Да вечара 3 жніўня ўлады заявілі, што чатыры энергаблокі станцыі «Энергас-Харуко» зноў запрацавалі, а некалькі падстанцый у наваколлях Гаваны зноў падключылі да сеткі.

Паўторныя адключэнні электраэнергіі парушаюць працу прадпрыемстваў, сферы грамадскіх паслуг і паўсядзённае жыццё па ўсёй краіне з насельніцтвам каля 10 млн чалавек. Большасць кубінцаў атрымлівае электраэнергію ў лепшым выпадку толькі на некалькі гадзін у дзень, што робіць нармальнае жыццё практычна немагчымым.

Урад вымушаны змагацца з недахопам харчоў, паліва і лекаў, а таксама з працяглым эканамічным спадам. Улады ўскладаюць віну на санкцыі і працяглае эмбарга з боку ЗША, што абмяжоўвае доступ да паліва, фінансавання і запасных частак, неабходных для падтрымання працы энергасістэмы.

Сёлета адміністрацыя прэзідэнта ЗША Дональда Трампа ўзмацніла санкцыі і ўвяла нафтавае эмбарга. Вашынгтон сцвярджае, што збоі ў электразабеспячэнні — наступства правалаў дзяржаўнай эканамічнай мадэлі Кубы.