Пад Тулай пасля удараў БПЛА цалкам згарэў склад Wildberries плошчай 300 тысяч «квадратаў»

• 5.08.2026, 8:07

Хаб у Алексіне з’яўляецца адным з найбольш буйных сартавальных цэнтраў гэтай кампаніі.

У ноч на 5 жніўня Сілы абароны Украіны нанеслі паветраны ўдар па сартавальнаму цэнтру Wildberries у Тульскай вобласці Расіі.

Паводле папярэдняй інфармацыі, гэты аб’ект практычна цалкам згарэў, піша Дыялог.UA пасля маніторынгу сацсетак.

Ракетную небяспеку ў Тульскай вобласці 5 жніўня абвясцілі прыблізна ў 00:34. А ў 02:52 ў гэтым расійскім рэгіёне адменілі ракетную небяспеку, а ў 04:56 адменілі небяспеку БПЛА. Губернатар Тульскай вобласці Дзмітрый Міляеў прызнаў, што ўначы 5 жніўня ўкраінскія дроны атакавалі склад Wildberries у горадзе Алексін. Паводле яго слоў, там «адбылося падзенне БПЛА з наступным узгараннем». Міляеў таксама заяўляе, што расійская СПА ў небе над Тульскай вобласцю нібыта збіла некалькі дзясяткаў украінскіх беспілотнікаў.

Расійскі маркетплэйс Wildberries прадае тавары для «СВА» (так у Расіі называюць вайну супраць Украіны) і яго выкарыстоўвае ваенна-прамысловы комплекс РФ для атрымання замежных тавараў, якія знаходзяцца пад заходнімі санкцыямі. У сувязі з гэтым лагістычныя цэнтры Wildberries з’яўляюцца законнымі мэтамі для ЗСУ.

Адзначым, што Wildberries у Алексіне з’яўляецца адным з найбуйнейшых сартавальных цэнтраў гэтай кампаніі. Яго плошча складае каля 300 тысяч квадратных метраў. Судзячы па відэа, выкладзеных у Сеціве, гэты аб’ект цалкам згарэў.