На захадзе Расіі разгарнулі ракетнае падраздзяленне КНДР
- 5.08.2026, 10:18
З’явіліся даныя ўкраінскай разведкі.
На захадзе Расіі пачалі разгортваць паўночнакарэйскую ракетную частку, і, хутчэй за ўсё, яна можа быць абсталяваная 120 балістычнымі ракетамі і шасцю пускавымі ўстаноўкамі для нанясення удараў па Украіне. Пра гэта паведаміў прадстаўнік ваеннай разведкі Украіны Андрэй Чарняк агенцтву Reuters.
Вядома, што з канца 2023 года Расія выпусціла па Украіне дзясяткі балістычных ракет КНДР, аднак разгортванне паўночнакарэйскіх ракетных войскаў стане пашырэннем і без таго шырокага вайсковага супрацоўніцтва паміж Масквой і Пхеньянам.
Паводле слоў Чарняка, Расія плануе размясціць ракетнае падраздзяленне ў складзе каля 90 паўночнакарэйскіх вайскоўцаў у Варонежскай вобласці на захадзе Расіі ў складзе 112-й ракетнай брыгады.
Ён падкрэсліў, што Паўночная Карэя ўжо адправіла ў Расію новую партыю з 40 ракет KN-23 і KN-24 разам з персаналам, аднак канчатковая канфігурацыя разгортвання і агульная колькасць ракет будуць узгоднены падчас перамоў на самым высокім узроўні ў наступным месяцы.
Чарняк сказаў, што РФ чакае, што разгортванне будзе ахопліваць 120 паўночнакарэйскіх балістычных ракет і шэсць пускавых установак. Пакуль не зразумела, якую менавіта ролю паўночнакарэйцы будуць адыгрываць у расійскіх ракетных аперацыях.
«Разгортванне, пра якое расказаў Чарняк, падобна, супадае з тым, што на мінулым тыдні Расія запусціла па Украіне першыя дзве паўночнакарэйскія ракеты з жніўня мінулага года», — нагадала агенцтва Reuters.
У прыватнасці, старшы навуковы супрацоўнік Інстытута даследаванняў знешняй палітыкі — аналітычнага цэнтра, што базуецца ў Філадэльфіі, Роб Лі падкрэсліў, што паўночнакарэйскія рэсурсы ўяўляюць сур'ёзную пагрозу для Кіева.
«Супрацьракетная абарона з’яўляецца адной з самых уразлівых кропак Украіны, таму любое павелічэнне колькасці балістычных ракет, з якімі ёй давядзецца мець справу, створыць яшчэ большы выклік», — падкрэсліў ён.
Лі дадаў, што асаблівую трывогу для Украіны выкліча стан яе супрацьпаветранай абароны гэтай зімой, калі РФ можа зноў нанесці магутны ўдар па энергасетцы, як гэта было ў мінулыя гады.
Паводле звестак украінскіх уладаў, на мінулым тыдні паўночнакарэйская ракета разбурыла жылы дом у вёсцы Радушнае (Дняпрапятроўская вобласць), у выніку чаго загінулі па меншай меры пяць членаў адной сям’і.
Чарняк падкрэсліў, што гэты ўдар стаў першым зафіксаваным выпадкам прымянення паўночнакарэйскіх балістычных ракет з жніўня 2025 года, і што для яго ажыццяўлення былі выкарыстаныя ракеты з новай партыі ў 40 адзінак.
Ён дадаў, што цяпер у Курскай вобласці Расіі, якая мяжуе з Украінай, знаходзіцца каля 9 500 паўночнакарэйскіх вайскоўцаў, але пакуль яны не прымаюць непасрэднага ўдзелу ў ваенных аперацыях супраць Украіны.