Wildberries западозрылі ў маштабных крадзяжах

• 5.08.2026, 17:03

На тле масіраваных удараў БПЛА.

У РФ расследуюць магчымыя крадзяжы тавараў унутры маркетплэйса Wildberries, які ў апошнія тыдні становіцца галоўнай мэтай Сіл абароны Украіны. Пра гэта паведамляе тэлеграм-канал «ВЧК-ОГПУ», які сцвярджае, што праверку праводзяць Следкам і Генпракуратура РФ.

Паводле звестак крыніц канала, частку тавараў маглі вывозіць са складоў пад выглядам эвакуацыі на неўлічаныя пляцоўкі, пры гэтым у сістэме маркетплэйса прадукцыя працягвала лічыцца на ранейшых складах. Пасля атак БПЛА частку адсутных тавараў маглі афармляць як знішчаныя, хаваючы рэальныя маштабы магчымай недастачы.

У публікацыі таксама гаворыцца, што меркаваная схема закранула тысячы прадаўцоў. Пры гэтым аўтары канала сцвярджаюць, што некаторыя прадпрымальнікі не вытрымалі фінансавых страт. Афіцыйнага пацвярджэння апублікаванай інфармацыі няма.