У цэнтры Мінска прадаюць нерухомасць кампаніі, якая звязана з бізнесменам Шакуціным

• 5.08.2026, 19:01

Яе кошт — амаль 10 млн рублёў.

На аўкцыён выставілі нерухомасць «Амкадор-Белвара», якая знаходзіцца ў цэнтры Мінска. Аб'ява апублікавана на сайце «БелЮрОбеспечения», заўважыла «Зеркало».

Вялікі будынак, размешчаны на вуліцы Гікала ў Мінску побач з філармоніяй, у агульнай складанасці займае каля 12 тыс. квадратных метраў.

Частку — аддалі ў арэнду, а іншая выглядае закінутай. Вядома, што па гэтым адрасе знаходзіцца некалькі пунктаў грамадскага харчавання.

Стартовая цана нерухомасці — 9 784 920 рублёў. Торгі прызначаныя на 3 верасня.

Нагадаем, «Амкадор-Белвар» уваходзіць у холдынг аднаго з найбуйнейшых машынабудаўнічых аб’яднанняў Беларусі — «Амкадор». У мінулым годзе паведамлялася, што дзяржава па хітрай схеме «адціснула» гэты холдынг у бізнесмена Аляксандра Шакуціна, які лічыцца набліжаным да Аляксандра Лукашэнкі. Сёлета вясной БРЦ высветліў, што набліжаны да ўлады прадпрымальнік, які давёў холдынг да фактычнага разарэння, захаваў значную частку бізнесу і працягвае зарабляць на брэндзе «Амкадор». Больш за тое, ён можа вярнуць долі ў кампаніях, што перайшлі пад кантроль дзяржавы. Пры гэтым разлікі па пазыках на сотні мільёнаў долараў, узятых на развіццё прадпрыемства, пераклалі на беларускі бюджэт.

Таксама ў 2025-м стала вядома, што даччыная фірма «Амкадор-Белвар» — «Завод СВТ» — абслугоўвала апаратуру для расійскіх стратэгічных ракетных комплексаў. Пасля рамонту і абслугоўвання апаратуру адпраўляюць у Расію. BELPOL адзначаў, што «Завод СВТ» адгружаў вырабы ў расійскую Саратаўскую вобласць — у вайсковую частку 89 553, размешчаную ў Тацішчаўскім раёне, пасёлку Светлы.