Беларусам распавялі пра важны нюанс прызначэння пенсіі

• 6.08.2026, 11:31

Рэкамендацыя Мінпрацы.

«Хутка выходжу на пенсію. Ці праўда, што пакуль я сама не напішу заяву, пенсію мне налічваць не будуць? Ці кампенсуюць мне пратэрмінаваны месяц?» — спытала ў «АіФ» жыхарка Пінска.

Не, не кампенсуюць. Законам замацаваны заяўны прынцып — пенсію не прызначаць, пакуль вы не напішаце заяву, патлумачылі ў Мінпрацы.

Найлепш падаць заяву за месяц да дня ўзнікнення права на пенсію або цягам месяца пасля яго: для мужчын — 63 гады, для жанчын — 58 гадоў. Калі права на пенсію ўзнікае 15 жніўня, вам варта звярнуцца з 15 ліпеня па 15 верасня.

У такім выпадку пенсію прызначаць з 15 жніўня. Калі вы спазніліся больш чым на месяц, пенсію прызначаць толькі з дня фактычнай падачы заявы. Грошы за пратэрмінаваны перыяд не кампенсуюцца. Днём звароту па пенсію лічыцца дата прыёму заявы органам сацабароны.