Што рабіць у спёку: парады беларускага педыятра для бацькоў

• 6.08.2026, 12:37

З 11:00 да 16:00 лепш заставацца ўдома.

Стала вядома, калі дзіцяці трэба выклікаць хуткую дапамогу з-за сонечнага ўдару, які здарыўся ў спякотнае надвор'е, піша narachanka.by.

Паводле слоў дзіцячага педыятра Светланы Апанасевіч з Мядзела, сонечны ўдар у дзяцей здараецца вельмі хутка. Бацькі могуць гэта зразумець па з'яўленні рэзкай слабасці, ванітаў, пачырваненні скуры і адсутнасці рэакцыі на дарослага.

Калі гэта здарылася, дзіця трэба неадкладна перанесці ў цень, пакласці на бок, каб яно не захлынулася ванітамі, прыкласці вільготны ручнік да шыі і галавы. Таксама пры сонечным удары трэба паіць вадой, але толькі па глытку.

- Калі праз паўгадзіны дзіцяці горш - выклікайце хуткую дапамогу 103, - падкрэсліла педыятр.

Доктар нагадала, што ў спякотнае надвор'е з 11.00 да 16.00 гадзін лепш знаходзіцца ўдома або ў цені.