«Белавія» набыла тры старыя Boeing з Гамбіі

• 6.08.2026, 16:50

Самалёты ўжо выкарыстоўваюцца на найбольш запатрабаваных маршрутах.

Для авіякампаніі гэтыя самалёты не новыя: у айчынным авіяпарку і раней было некалькі паветраных суднаў такога тыпу, якія выконваюць рэйсы на кароткія і сярэднія адлегласці, піша Times.by.

«Пашырэнне авіяпарку дазваляе павялічыць перавозныя магчымасці авіякампаніі, яшчэ больш дынамічна развіваць маршрутную сетку, забяспечваць дадатковую гнуткасць пры фарміраванні раскладу», — адзначыў генеральны дырэктар «Белавіі» Ігар Чэргінец.

Усе гэтыя самалёты ўжо ўведзены ў эксплуатацыю, іх укараненне ў вытворчы працэс адбывалася паэтапна. Цяпер паветраныя судны выкарыстоўваюцца на найбольш запатрабаваных рэгулярных і чартарных маршрутах.

Упершыню спотэры звярнулі ўвагу на магчымае папаўненне авіяпарку «Белавіі» ў пачатку гэтага лета. Авіяцыйныя рэсурсы паведамлялі, што самалёты прыбылі ў Мінск з Гамбіі і маюць узрост 12—13 гадоў.