OpenAI выпусціць разумную калонку ў форме пончыка

• 7.08.2026, 12:08

Яна будзе каштаваць больш за $300.

Кампанія OpenAI рыхтуе да выпуску ў 2027 годзе новую прыладу са штучным інтэлектам у форме пончыка, якая будзе каштаваць больш за $300, паведаміла Bloomberg са спасылкай на крыніцы.

Паводле іх дадзеных, гаджэт памерам з хакейную шайбу стане разумнай калонкай без экрана, якую можна будзе лёгка пераносіць па доме адной рукой. Прылада атрымае галасавы інтэрфейс на базе ChatGPT, камеры, мікрафоны, дынамікі, падсвятленне і рухомыя элементы, прызначаныя зрабіць узаемадзеянне з карыстальнікам больш натуральным.

Як піша Bloomberg, навінка стане першай прыладай OpenAI для масавага рынку і будзе пазіцыянавацца як AI-камп'ютар для паўсядзённых задач. Праект распрацоўваецца сумесна са студыяй LoveFrom былага галоўнага дызайнера Apple Джоні Айва. Кошт прылады, паводле дадзеных агенцтва, складзе ад $300 да $400.

У доўгатэрміновай перспектыве OpenAI разлічвае стварыць лінейку ўласных прыладаў са штучным інтэлектам і з цягам часу прапанаваць альтэрнатыву сучасным смартфонам.