Дамаск і Масква вызначыліся з лёсам расійскіх баз у Сірыі

• 9.08.2026, 20:30

Апублікаваны мемарандум.

Сірыя і РФ заключылі мемарандум аб узаемаразуменні адносна рэарганізацыі расійскай прысутнасці на сірыйскім узбярэжжы. Расійскія базы Тартус і Хмеймім будуць пераўтвораныя ў сумесныя навучальныя цэнтры.

Пра гэта паведаміла сірыйскае дзяржаўнае агенцтва SANA са спасылкай на інфармацыю МЗС Сірыі.

Згодна з мемарандумам, Сірыя возьме на сябе кіраванне аб’ектамі, прызначанымі для грамадзянскага выкарыстання, уключаючы аэрапорт Хмеймім і чацвёрты камерцыйны прычал у порце Тартус. Расійскія ваенныя базы Тартус і Хмеймім будуць пераўтвораныя ў сумесныя навучальна-кваліфікацыйныя цэнтры, а пераходны перыяд павінен завяршыцца на працягу трох месяцаў.

МЗС Сірыі назваў пагадненне найважнейшай падзеяй за тыя паўтара года, пакуль ішлі перамовы.

У канцы кастрычніка 2025 года агенцтва Bloomberg паведаміла, што Расія аднавіла палёты на авіябазу Хмеймім у Сірыі пасля паўгадавога перапынку. Таксама ў кастрычніку 2025 года расійскі дыктатар Пуцін сустракаў у Маскве Ахмеда аль-Шараа, які стаў пераходным прэзідэнтам Сірыі пасля звяржэння рэжыму Башара Асада у снежні 2024 года. Пуцін прапаноўваў аль-Шараа дружбу, хоць менш за 10 гадоў таму расійскі МЗС яшчэ пагражаў яму знішчэннем.