Віцэ-канцлер Германіі дэманстратыўна адмовіўся фатаграфавацца з дэлегацыяй РФ

• 1.09.2026, 8:28

Еўрапейскія прадстаўнікі на саміце G20 падтрымалі гэтую пазіцыю.

Віцэ-канцлер і міністр фінансаў Германіі Ларс Клінгбайль заявіў, што адмовіўся ўдзельнічаць у сумеснай фатаграфіі з расійскім міністрам фінансаў і дэлегацыяй РФ на саміце G20.

Паводле яго слоў, еўрапейскія прадстаўнікі падтрымалі гэтую пазіцыю, таму выніковае агульнае фота адбылося без прадстаўнікоў краіны-агрэсара.

Клінгбайль распавёў, што падчас пленарнага пасяджэння асабіста звярнуўся да расійскага міністра фінансаў і заклікаў урад РФ спыніць вайну супраць Украіны.

Ён таксама падкрэсліў, што Германія і Еўропа адназначна на баку Украіны. Паводле слоў нямецкага палітыка, прадстаўнікі розных краін могуць адкрыта крытыкаваць адно аднаго і абмяркоўваць вайну непасрэдна за сталом перамоваў.

Аднак супольная «сямейная фатаграфія» з расійскай дэлегацыяй у цяперашніх умовах, на яго думку, была б занадта недарэчнай.