У Краснаярскім краі РФ вучаніца напала на настаўніцу падчас лінейкі

• 1.09.2026, 10:20

Пацярпелі сем чалавек.

У школе № 2 Канска падчас лінейкі вучаніца распыліла перцавы балончык і з нажом напала на настаўніцу, паведаміла мясцовае выданне «Проспект мира». У выніку ў бальніцу трапілі 7 чалавек, у тым ліку 5 дзяцей, паведамілі Ngs24 у рэгіянальным міністэрстве аховы здароўя. Там удакладнілі, што ўсе пацярпелыя атрымалі медыцынскую дапамогу і былі накіраваныя на амбулаторнае назіранне.

У краснаярскім «Міжрэгіянальным цэнтры па правах дзяцей» заявілі, што нападніцай была сямікласніца. Калі яна паспрабавала ўжыць нож, на дапамогу настаўніцы прыйшла адна з бацькоў, якая выштурхнула дзяўчынку з класа. Відавочцы таксама сцвярджаюць, што ў калідоры вучаніца падпаліла бутэльку з запальнай сумессю.

На месцы надзвычайнага здарэння працуюць следчыя, святочную лінейку адмянілі. Блізкі да сілавікоў тэлеграм-канал Baza піша, што ў нападніцы не было сур'ёзных праблем у школе — яе толькі сварылі за знешні выгляд.

Пры гэтым, паводле даных Mash, раней у навучальнай установе выявілі недахопы ў забеспячэнні бяспекі і арганізацыі псіхолага-педагагічнай дапамогі. Вясной яна атрымала папярэджанне: за год колькасць вучняў з «групы высокай рызыкі» вырасла з 7 да 17, а ўжываныя меры правяральнікі палічылі недастатковымі.

З пачатку года гэта як мінімум трэцяе нападзенне ў навучальных установах Краснаярскага краю. 3 лютага ў школе № 4 сямікласніца паспрабавала ўдарыць ножам педагога, а потым параніла равесніцу. На наступны дзень у школе № 153 васьмікласніца абліла бензінам і падпаліла аднакласніка.