Намесніка камандзіра Рускага добраахвотніцкага корпуса выкралі ля ўласнага дома

• 1.09.2026, 18:19

У штабе РДК б'юць трывогу.

Намеснік камандзіра РДК Стэпан Каплуноў некалькі дзён таму знік ля ўласнага дома. У штабе заяўляюць, што дагэтуль не ведаюць, дзе ён знаходзіцца.

Пра гэта паведамляе Рускі добраахвотніцкі корпус.

Паводле слоў начальніка штаба РДК Аляксандра Фартуны, пасля знікнення Каплунава прадстаўнікі РДК звярнуліся ў Галоўнае ўпраўленне разведкі, Службу бяспекі Украіны і Дзяржаўнае бюро расследаванняў.

«Дагэтуль мы не атрымалі ніводнай дакладнай інфармацыі ні пра месцазнаходжанне Стэпана, ні пра выстаўленыя яму абвінавачанні», — заявіў Фартуна.

Ён дадаў, што камандаванне РДК працягвае сачыць за сітуацыяй. Пра абставіны справы таксама паведамілі амбудсменам, а адвакаты накіравалі адпаведныя запыты.

Асобна Фартуна звярнуў увагу на тое, што Каплуноў быў узнагароджаны прыкладна месяц таму, а цяпер, паводле яго слоў, ён апынуўся пад вартай.

«Калі Украіна — прававая дзяржава, а не тэрыторыя, якая скочваецца ў беззаконне і татальнае самавольства сілавікоў, як, напрыклад, Расійская Федэрацыя, такое проста недапушчальна», — падкрэсліў начальнік штаба РДК.