У Францыі сышоў з рэек пасажырскі цягнік

• 12.09.2026, 10:41

Больш за 40 пацярпелых.

У выніку чыгуначнай аварыі на паўночным захадзе Францыі ўвечары ў пятніцу пацярпелі больш за 40 чалавек, адна пасажырка — у крытычным стане.

Пра гэта паведамляе BFMTV.

Аварыя адбылася з рэгіянальным цягніком TER каля 19:30 на лініі паміж Руанам і Канам на паўночным захадзе Францыі, у раёне камун Клеон і Турвіль-ля-Рыўер.

У мясцовай прэфектуры паведамілі пра 44 пацярпелых, адна 18-гадовая пасажырка знаходзіцца ў крытычным стане.

Паводле звестак крыніц у паліцыі, папярэдняя версія прычыны аварыі — наезд электравоза на невядомы аб’ект на пуцях, аднак публічна версіі не агучвалі. Усяго з рэек сышлі пяць вагонаў, адзін з іх перакуліўся.

Аварыя сур’ёзна парушыла рух на лініі: чатыры цягнікі з Гавра і Руана ў Парыж прыбылі з шматгадзіннымі затрымкамі.

Гэта найбуйнейшы чыгуначны інцыдэнт у Францыі за апошні час.