Уладзімір Арлоў трапіў у фінал прэстыжнай польскай літаратурнай прэміі

• 2.09.2026, 21:09

Беларускі пісьменнік увайшоў у лік фаварытаў з творам «Танцы над горадам. Тры гісторыі».

Беларускі пісьменнік Уладзімір Арлоў з творам «Танцы над горадам. Тры гісторыі» (у перакладзе Багдана Задуры) увайшоў у лік сямі фіналістаў Цэнтральнаеўрапейскай літаратурнай прэміі «Ангелус». Узнагароду штогод уручае Вроцлаўскі Дом Літаратуры за найлепшую кнігу прозы, напісаную па-польску або перакладзеную на польскую мову, піша Budzma.org.

Сёлета ў лік фіналістаў увайшлі:

Уладзімір Арлоў (Беларусь);

Сяргей Жадан (Украіна);

Георгі Гасподзінаў (Балгарыя);

Юлія Ілюха (Украіна);

Мілена Маркавіч (Сербія);

Катержына Тучкава (Чэхія);

Йоанна Чэчотт (Польшча).

«Я перакананы, што сярод цяперашніх намінантаў ёсць і будучыя лаўрэаты Нобелеўскай прэміі», — кажа старшыня журы прэміі Андрэй Хадановіч.

Урачыстае абвяшчэнне лаўрэатаў прэміі адбудзецца 17 кастрычніка ў Вроцлаве. Гэта будзе часткай фестывалю Бруна Шульца, падчас якога, між іншым, запланаваныя чытанні ўрыўкаў намінаваных твораў і дыскусія з удзелам перакладчыкаў і перакладчыц.

Пераможца атрымае ўзнагароду ў памеры 150 000 злотых (каля 40,6 тысячы долараў), і гэта робіць «Ангелус» найвышэйшай літаратурнай узнагародай, якая прысуджаецца ў Польшчы, у фінансавым плане. Акрамя таго, прэміі ў памеры 5 000 злотых (каля 1355 долараў) уручаюцца ўсім аўтарам, чые кнігі трапілі ў фінал.