Мінфін РФ паведаміў пра скарачэнне грамадзянскіх выдаткаў бюджэту дзеля вайны з Украінай
- 22.09.2026, 7:14
Антон Сілуанаў паведаміў пра «няпросты бюджэт».
Расійскаму Мінфіну для выканання прыярытэту «ўсё для фронту» і балансавання бюджэту давялося перанесці частку выдаткаў на больш познія перыяды. Пра гэта паведаміў кіраўнік ведамства Антон Сілуанаў на Маскоўскім фінансавым форуме, перадае The Moscow Times.
«Найважнейшае ў нас цяпер — гэта задачы абароны, задачы фронту», — сказаў міністр, дадаўшы, што для вырашэння бюджэтных праблем сёлета «давялося дзе-нідзе пакопацца», папрацаваўшы і з выдаткамі, і з рэсурснай базай.
«Мы літаральна ў першыя месяцы бягучага года, ужо разумеючы, што бюджэт няпросты, выпрацавалі шэраг мер. Потым яшчэ літаральна пару месяцаў таму падрыхтавалі шэраг мер па бюджэтнай кансалідацыі», — цытуе Сілуанава Reuters.
Складваючы бюджэт на бягучы год, Мінфін разлічваў скараціць леташні дэфіцыт у 5,7 трлн рублёў (2,6% ВУП) да 3,7 трлн (1,6% ВУП) за кошт павышэння ПДВ і падаткаў для малога бізнесу. Але ўжо да канца першага квартала «дзірка» ў казне перавысіла план на ўвесь год. А да снежня з-за перарасходу сродкаў на ваенныя артыкулы яна магла дасягнуць 9 трлн рублёў (3,9% ВУП), расказвалі крыніцы Bloomberg. Каб не дапусціць гэтага, паводле суразмоўцаў агенцтва, Мінфін на траціну скараціў выдаткі па грамадзянскіх артыкулах, а ўрад спусціў у рэгіёны ўказанне скараціць штат бюджэтнікаў і дзяржаўных служачых на 15%.
Паводле вынікаў студзеня—жніўня дэфіцыт федэральнага бюджэту дасягнуў 5,8 трлн рублёў (2,5% ВУП). І, паводле слоў Сілуанава, ён працягне павялічвацца. «У ходзе выканання бюджэту ўзніклі дадатковыя патрэбы ў фінансаванні, у выдатках. І для гэтага будуць прадугледжаны дадатковыя крыніцы фінансавання гэтых выдаткаў. Мы чакаем, што дэфіцыт будзе большы, чым запланавалі, але будзе ў межах 3% ВУП», — сказаў міністр. Ён дадаў, што закрываць дэфіцыт урад плануе, расходуючы назапашаныя рэшткі на рахунках, а таксама пазычаючы грошы на даўгавым рынку.
У закон аб бюджэце-2026 урад першапачаткова заклаў 12,9 трлн рублёў па артыкуле «нацыянальная абарона». Фактычныя выдаткі на вайну (уключаючы сумежныя бюджэтныя артыкулы) ужо па выніках паўгоддзя дасягнулі 10,687 трлн рублёў, паводле падлікаў Яніса Клюге з нямецкага Інстытута праблем міжнароднай бяспекі.
У параўнанні з аналагічным перыядам мінулага года выдаткі на армію і вытворчасць зброі павялічыліся яшчэ на 30%, адносна студзеня—чэрвеня 2024 года — на 65%, а ў параўнанні з даваенным 2021‑м — больш чым у 5 разоў. У сукупнасці з пачатку 2022 года Крэмль выдаткаваў на армію больш за 57 трлн рублёў.