Сілы абароны Украіны адным ударам дрона знішчылі склад боепрыпасаў РФ у Гуляйполі

• 22.09.2026, 19:49

Відэафакт.

Сілы абароны Украіны ўдарам FPV-дрона знішчылі варожы склад артылерыйскіх боепрыпасаў у Гуляйполі Запарожскай вобласці. Пра гэта гаворыцца ў заяве 7-га корпуса Дэсантна-штурмавых войскаў Узброеных Сіл Украіны.

«Грузавік з боекамплектам, які рухаўся па горадзе, выявілі сумежныя падраздзяленні. Яны адсочылі перамяшчэнне тэхнікі да сховішча — аднаго з ангараў у Гуляйполі», — паведамілі вайскоўцы.

Менш чым праз тры з паловай гадзіны пасля выяўлення мэты Сілы абароны Украіны нанеслі ўдар. Аперацыю правялі пілоты 225-га асобнага штурмавога палка ва ўзаемадзеянні з 7-м корпусам ДШВ.

Грузавік з боепрыпасамі ўдалося паразіць непасрэдна ўнутры ангара адным дакладным ударам FPV-дрона. Адразу пасля гэтага ў сховішчы адбылася маштабная дэтанацыя каля 60 артылерыйскіх снарадаў калібру 152 мм.

Фіксацыю трапляння і аб’ектыўны кантроль паражэння варожага аб’екта забяспечылі пілоты 414-й асобнай брыгады СБС «Птушкі Мадзяра».

«Выканаць задачу ўдалося дзякуючы дакладнай узаемадзеі некалькіх падраздзяленняў Сіл абароны — ад выяўлення і перадачы мэты да яе паражэння і даразведкі», — гаворыцца ў заяве.