Трамп сустрэўся з часовай прэзідэнткай Венесуэлы Дэлсі Радрыгес
- 23.09.2026, 9:35
Упершыню пасля затрымання Мадуры.
Прэзідэнт ЗША Дональд Трамп сустрэўся з часовай прэзідэнткай Венесуэлы Дэлсі Радрыгес позна ўвечары 22 верасня на палях Генеральнай Асамблеі ААН. Гэта была іх першая сустрэча пасля захопу амерыканскімі сіламі былога кіраўніка Венесуэлы Нікаласа Мадуры, паведамляе Reuters.
Кароткая размова адбылася на прыёме, наладжаным Трампам, падчас першага візіту Радрыгес у ЗША пасля ўступлення на пасаду.
Венесуэльская дэлегацыя імкнецца прадставіць краіну як прывабную для інвестыцый, паведамілі агенцтву Reuters дзве крыніцы.
Радрыгес назвала размову з Трампам гістарычным крокам на шляху да ўмацавання сувязяў з ЗША ў сферах энергетыкі, горназдабыўной прамысловасці і бяспекі.
«Венесуэлу і Злучаныя Штаты звязваюць гістарычныя адносіны, якія на гэтым новым этапе нам трэба развіваць праз дыялог. Мы працягнем весці знешнюю палітыку, што адказвае нацыянальным інтарэсам і накіраваная на дасягненне канкрэтных вынікаў і забеспячэнне агульнага дабра для народа Венесуэлы», — напісала яна ў сваім тэлеграм-канале пасля перамоў.
Трамп наладзіў працоўныя адносіны з Радрыгес, якая раней займала пасаду віцэ-прэзідэнткі пры Мадуры. Аднак крытыкі сцвярджаюць, што Вашынгтон адсунуў на другі план апазіцыю на чале з Марыяй Корынай Мачада, адмовіўшыся ад патрабаванняў правядзення свабодных выбараў дзеля заключэння нафтавых і інвестыцыйных здзелак з часовым урадам, піша Reuters.
У сваім выступленні на Генеральнай Асамблеі Трамп назваў Мадуру «дыктатарам-злачынцам», адзначыў, што пасля яго захопу былі вызваленыя сотні палітычных зняволеных, і прывёў гэты рэйд як доказ таго, што ЗША будуць абараняць свае інтарэсы ў Заходнім паўшар'і.
«Пераможцу дастаюцца трафеі», — заявіў ён, назваўшы нафтавую здзелку, заключаную яго адміністрацыяй з Каракасам у мінулым месяцы, «магчыма, найбуйнейшай здзелкай у гісторыі».
Трамп заяўляў пра сваё жаданне прыцягнуць у нафтавую галіну Венесуэлы інвестыцыі ў памеры 100 мільярдаў долараў. Паводле звестак крыніц, Радрыгес прыбыла ў Нью-Ёрк у панядзелак у складзе дэлегацыі, якая вядзе перамовы па пытаннях энергетыкі, горназдабыўной прамысловасці і запазычанасці з прадстаўнікамі ўладаў ЗША, міжнароднымі крэдыторамі і кампаніямі.
Кіраўнік Міжамерыканскага банка развіцця прыкладае намаганні для адабрэння крэдыту для Венесуэлы на суму 2,5 мільярда долараў, аднак сутыкаецца з пярэчаннямі з боку некаторых членаў савета дырэктараў банка.
Раней у аўторак каля будынка ААН сабраліся больш за 50 пратэстоўцаў з венесуэльскімі сцягамі і плакатамі з надпісамі «Няма выбараў — няма нафты» і «Новы твар — той жа рэжым», каб выказаць пратэст супраць візіту Радрыгес.
Шмат хто з іх выказваў надзею, што Трамп будзе настойваць на правядзенні ў краіне свабодных выбараў.