Руттэ: НАТА наўмысна ўтойвае ад Пуціна, што пацягне прымяненне 5-га артыкула

• 23.09.2026, 15:15

Альянс мае ўсе неабходныя магчымасці для рэагавання на актывізацыю гібрыдных атак з боку РФ.

Расійскі дыктатар Уладзімір Пуцін разумее, да чаго можа прывесці прымяненне арт. 5 НАТА і якімі будуць наступствы, але Альянс наўмысна ўтойвае свае «чырвоныя лініі».

Пра гэта заявіў генеральны сакратар НАТА Марк Руттэ у інтэрв’ю DPA. «Мы ніколі не будзем гаварыць пра тое, што менавіта актывуе артыкул 5. Гэтая двухсэнсоўнасць існуе, і яна застанецца. Але расіяне, запэўніваю вас, выразна разумеюць, што гэта будзе», — сказаў ён.

Генсек падкрэсліў, што ў Альянса ёсць шэраг варыянтаў рэагавання на дзеянні Расіі ніжэй парога артыкула 5 і дапусціў, што некаторыя з іх могуць застацца схаванымі.

«У нас ёсць усе неабходныя варыянты рэагавання. Гэта не заўсёды будзе публічна… Прыкладамі гэтага былі крокі, скіраваныя на падрыў ценявога флоту Масквы, які перавозіць падсанкцыйныя нафтапрадукты, і аперацыя НАТА «Балтыйскі страж», распачатая ў адказ на пашкоджанне жыццёва важных падводных кабеляў», — сказаў Руттэ.

Таксама ён адзначыў, што «гэтыя гібрыдныя атакі — відавочны знак роспачы Расіі» на тле вялікіх страт ва Украіне, бо Кіеў «становіцца ўсё лепшым у нанясенні ўдараў глыбока ўнутры Расіі».

У той жа час Руттэ падкрэсліў, што Еўропа павінна «ўзмацніць» сваю абарону, папярэдзіў пра канфлікт «на двух тэатрах ваенных дзеянняў» у выпадку, калі Кітай пачне ваенныя дзеянні супраць Тайваня, дапусціўшы, што гэта прымусіць Расію напасці на Еўропу:

«Па ўсіх гэтых прычынах мы павінны зрабіць крок наперад у Еўропе. Менавіта гэта мы і робім».