Хакеры выклалі ў сеціва асабістую перапіску Пяскова
- 23.09.2026, 18:57
Прэс-сакратар дыктара РФ абмяркоўваў Пуціна, Такаева, вайну ва Украіне і Прыгожына.
Хакерская група Black8Mirror выклала ў Сеці перапіску Дзмітрыя Пяскова пра Прыгожына і вайну ва Украіне з уплывовым крэмлёўскім чыноўнікам Міхаілам Бабічам, былым паўнамоцным прадстаўніком Пуціна ў Прыволжскай федэральнай акрузе.
«Агенцтва» піша, што адзін з фрагментаў датычыцца выступлення прэзідэнта Казахстана Касыма-Жамарта Такаева 25 ліпеня. Падчас сустрэчы з Пуціным у Омску ён раптоўна загаварыў пра вайну супраць Украіны, сказаў, што яе прырода «не зусім зразумелая» у тым ліку Казахстану, і прапанаваў яе «замарозіць».
У апублікаваным дыялогу «Бабіч» пытаецца ў «Пяскова» пра гэтае выступленне. Акаўнт, падпісаны імем Пяскова, адказвае: «Чысты экспромт». Потым ён мяркуе, што Такаева «хтосьці папрасіў гэта сказаць», і разважае, хто менавіта: «украінцы, амерыканцы або хтосьці знутры».
Іншы фрагмент датычыцца з'яўлення Пуціна на Дзень ВМФ у Санкт-Пецярбургу 26 ліпеня. Сёлета вялікага ваенна-марскога параду зноў не было, а Пуцін прыехаў у Галоўнае Адміралцейства на аўтамабілі.
Згодна з уцечкай, «Бабіч» апісаў цырымонію так: «У засраным дворыку Адміралцейства, замест мора - банер, замест войскаў - рота ганаровай варты з сухапутных салдат... Дзіма, хто гэтую фігню прыдумаў, куды яны яго цягнуць...»
«Пяскоў» нібыта адказвае коратка: «Ну так бяспечна».
Найбольш змястоўны фрагмент адносіцца да мая 2023 года і звязаны з Яўгенам Прыгожыным. У перапісцы «Бабіч» перасылае тэкст пра тое, што Прыгожын лічыў зняволенне Аляксея Навальнага выгадным для карупцыянераў, бо расследаванні Навальнага раней перашкаджалі чыноўнікам спакойна выводзіць украдзеныя грошы.
У гэтым моманце Пяскоў становіцца адкрытым у сваіх ацэнках.
«Яўген Прыгожын лічыць, што турэмнае зняволенне апазіцыянера Аляксея Навальнага «разбэшчыла» чыноўнікаў-карупцыянераў: паводле яго меркавання, раней мздаімцы вельмі баяліся згадвання ў расследаваннях Навальнага... Ён быў вельмі карысны, таму што калі нейкі кіраўнік карпарацыі спілыў грошы, і Навальны пачынаў пра гэта верашчаць, то яму было небяспечна выводзіць гэтыя грошы. А цяпер, калі Навальны сядзіць, - Навальнага няма, спілыў грошы, пытанняў няма», - гаворыцца ў перасланым паведамленні.
У адказ «Пяскоў» нібыта піша: «Трагедыя ў тым, што ўсё гэта праўда і ўсе мы так ці іначай пра гэта гаворым... толькі лічыцца, што пра гэта нельга публічна гаварыць».