Агент беларускіх спецслужбаў карэктаваў расійскія ўдары па Кіеву

• 24.09.2026, 11:52

Украінскі суд асудзіў яго да 15 гадоў пазбаўлення волі.

Ва Украіне асудзілі да 15 гадоў пазбаўлення волі з канфіскацыяй маёмасці мужчыну, які, паводле даных Службы бяспекі Украіны, адначасова працаваў на расійскія і беларускія спецслужбы. Ён збіраў інфармацыю пра ўкраінскіх вайскоўцаў для Беларусі, а для Расіі карэктаваў ракетна-дронавыя ўдары па энергетычных аб’ектах Кіева. Пра прысуд СБУ паведаміла 23 верасня.

Мужчыну затрымалі ў Кіеве яшчэ ў снежні 2025 года.

Паводле звестак следства, заданні ад дзвюх спецслужбаў адрозніваліся. Па даручэнні беларускага боку агент адсочваў месцы дыслокацыі Сілаў абароны Украіны. Расійскія куратары даручалі яму збіраць інфармацыю для ўдараў па энергетычных аб’ектах украінскай сталіцы.

У прыватнасці, з акна ўласнай кватэры мужчына арганізаваў назіранне за адной з кіеўскіх цеплаэлектрацэнтраляў. Ён таксама аглядаў тэрыторыю каля аб’екта, каб вызначыць яго тэхнічны стан пасля папярэдніх расійскіх атак.

СБУ заяўляе, што агент працаваў разнарабочым на будаўніцтве сховішча для адной з кіеўскіх школ, а ў поле зроку расійскіх і беларускіх спецслужбаў трапіў праз Telegram-каналы.

Пасля выканання заданняў мужчына разлічваў пакінуць Украіну. У яго знайшлі падрыхтаваны тактычны заплечнік з рэчамі, якія ён збіраўся выкарыстаць пры нелегальным перасячэнні мяжы ў кірунку Расіі.

Суд прызнаў яго вінаватым у дзяржаўнай зрадзе, учыненай ва ўмовах ваеннага становішча, і прысудзіў да 15 гадоў пазбаўлення волі з канфіскацыяй маёмасці.