Пуцін упаў у істэрыку
- 26.09.2026, 17:21
Эфектыўнасць прапаганды ў РФ падае.
Вынікі парламентскіх «выбараў» расійскі дыктатар Уладзімір Пуцін паспрабуе выкарыстаць для эскалацыі ў вайне супраць Украіны. Выданне Foreign Affairs (пераклад — «УНІАН») піша, што галоўная мэта Крамля — стварыць сітуацыю, калі ў краіне нібыта падтрымліваюць уладу Пуціна і яго вайсковую палітыку, хоць рэальны стан спраў у Расіі іншы.
Незалежныя апытанні паказваюць зніжэнне долі рэспандэнтаў, якія лічылі вайну Пуціна паспяховай. Гэта сведчыць пра падзенне маральнага духу насельніцтва і наяўнасць трывогі ў грамадстве, звязанай з магчымасцю далейшай мабілізацыі, інфляцыяй, абмежаваннямі доступу ў інтэрнэт і паліўным крызісам.
«Але пакуль Пуцін лічыць, што час на ягоным баку, а народ загіпнатызаваны тым, што Крэмль называе «адзінствам», прадэманстраваным падчас «выбараў», і гатовы несці цяжар бед, ён будзе працягваць вайну. А працяг азначае эскалацыю, як за мяжой, так і ўнутры краіны», — пішуць аўтары.
Яны мяркуюць, што Пуцін адхіліў усе дыпламатычныя ініцыятывы і ўзмацніў атакі на Украіну:
«Зімой Крэмль плануе літаральна замарозіць Украіну, нанеся ўдар па яе энергасістэме. Для Пуціна эскалацыя стала галоўным сродкам утрымання ўлады».
Пра гэта, на іх думку, сведчаць розныя прыкметы. У прыватнасці тое, што Крэмль пастаянна раздзімае пачуццё надзвычайнай сітуацыі і навязвае насельніцтву менталітэт аблогі. Адзначаецца, што стэрыльныя выбары ўзмацнілі пуцінскі мандат на «якія заўгодна дзеянні, што ён палічыць неабходнымі».
Аднак, на думку аўтараў, пакуль немагчыма вызначыць, наколькі далёка распаўсюджваецца такая легітымнасць. Грамадзянам даводзіцца самастойна спраўляцца з наступствамі ўдараў Украіны па НПЗ, пустымі запраўкамі, хранічнай інфляцыяй. Але пакуль незразумела, ці падтрымаюць яны дзеля гэтага ўзмацненне мабілізацыі.
Эскалацыя ўнутры краіны
Відавочныя прыкметы таго, што пуцінская вайна ўзмацняецца не толькі на знешнім фронце. Яна бачная і ўнутры Расіі. У прыватнасці праз пастаянныя арышты тых, хто не згодны з палітыкай Крамля, а таксама рост падатковага цяжару, бо ў рэжыму не стае сродкаў на вайну.
— Без узмацнення ўнутранага ціску рэжым не можа нарошчваць свае знешнія дзеянні. Стварэнне крызісаў стала асновай сістэмы Пуціна і механізмам, з дапамогай якога ён утрымлівае сваю ўладу, — гаворыцца ў артыкуле.
Але вынік гэтай стратэгіі ўжо не такі высокі, як раней. І нават у асяроддзі прапаганды праяўляюцца прыкметы істэрыі. Напрыклад, намеснік старшыні парламента і былы тэлевядучы Пётр Талстой адкрыта кажа пра «неабходнасць наносіць удары па грамадзянскім насельніцтве праціўніка, каб яго дэмаралізаваць»:
«Мова нянавісці і ўслаўленне жорсткасці і гвалту сталі яшчэ адной формай эскалацыі. Але эфект слабее пры частым выкарыстанні».
Аўтары робяць выснову, што схільнасць Крамля да эскалацыі любога кшталту — гэта не прыкмета сілы, а прыкмета слабасці. У выніку, лічаць яны, такая палітыка толькі ўзмоцніць расчараванне многіх людзей, стомленых ад умоў жыцця, навязаных дзяржавай.
Пратэстаў у пуцінскай Расіі не чакаецца, але відаць прыкметы позніх савецкіх гадоў, калі існаванне ў створанай сістэме было толькі імітацыяй нармальнага жыцця.
«Крызіс рэжыму Пуціна — гэта крызіс будучыні. Ён не ведае, куды рухацца і дзеля чаго, таму зацягвае вайну як сродак выжывання», — пішуць аглядальнікі.
Пры гэтым адміністрацыя прэзідэнта ЗША спрабуе паказаць Пуціну «шлях да адступлення», абяцаючы буйныя здзелкі і паралельна пагражаючы ўвесці «пякельныя» санкцыі. Але няма прыкмет таго, што Пуцін на гэта пойдзе. Хутчэй ён паспрабуе пацягнуць вайну яшчэ пэўны час, асабліва зімой, выкарыстоўваючы холад як зброю.