Беларуска атрымала ад бацькі спадчыну з «сюрпрызам»

• 30.09.2026, 14:26

Пра гэта жыхарка Бабруйска даведалася ў самы непадыходны момант.

Спроба абмяняць стодоларавую купюру са спадчыны бацькі абярнулася для 66-гадовай бабруйчанкі нечаканымі праблемамі проста ў абменным пункце, паведаміла MyFin афіцыйная прадстаўніца ўпраўлення Дзяржаўнага камітэта судовых экспертыз па Магілёўскай вобласці Ірына Рачкоўская.

Пенсіянерка прыйшла ў абменны пункт, каб здаць 300 долараў, але адна з банкнотаў выклікала падазрэнні ў касіра.

— Купюру з прыкметамі падробкі накіравалі на судовую экспертызу бабруйскім экспертам, — распавяла Ірына Рачкоўская. — Даследаванне пацвердзіла, што грашовы білет выпушчаны не прадпрыемствам, якое ажыццяўляе вытворчасць долараў ЗША, а выраблены метадам плоскага афсетнага друку. Вадзяны знак, рэльефнасць і іншыя элементы абароны імітаваныя.

Паводле слоў бабруйчанкі, долары дасталіся ёй пасля смерці бацькі. Пра тое, што сярод іх ёсць падробка, жанчына нават не падазравала, пакуль не прыйшла ў абменны пункт.

Бабруйскі міжраённы аддзел Следчага камітэта ўзбудзіў крымінальную справу па факце вырабу падробленай банкноты.