Новая версія расійскай «Арматы» здзівіла нават экспертаў
- 30.09.2026, 14:45
Клінічная гігантаманія.
Расія мадэрнізавала танк Т-14 «Армата», фактычна ператварыўшы яго ў новую машыну, якая зможа выконваць нетыповыя для асноўнага баявога танка задачы. Пра гэта паведамляюць расійскія прапагандысцкія СМІ, піша УНІАН.
«Ростэх» мадэрнізаваў расійскі танк Т-14 «Армата» да ўзроўню зенітна-ракетнага комплексу малой далёкасці», — піша «Звезда».
Паводле дадзеных пракрамлёўскага рупара, 125-мм гармату замянілі на 152-мм гладкаствольную з храмаваным ствалом. Гэта дазволіла аснасціць Т-14 супрацьтанкавымі кіраванымі ракетамі «Корнет», далёкасць прымянення якіх, паводле заяў, складае да 10 000 метраў.
Машыну плануюць аснасціць артылерыйскім боепрыпасам сямейства «Краснополь» з донным газагенератарам і спадарожнікавай сістэмай навігацыі. Паводле задумы распрацоўнікаў, менавіта гэта дазволіць Т-14 выконваць функцыі зенітнага комплексу.
Акрамя БПЛА «Птэрадактыль», машына атрымае яшчэ адзін тып бартавога беспілотніка, прызначанага для разведкі і навядзення высокадакладных боепрыпасаў на мэту на значных адлегласцях.
Боекамплект машыны будзе складацца з 40 снарадаў, 24 з якіх будуць размяшчацца ў аўтамаце зараджання.
Новая версія танка зможа выкарыстоўваць боепрыпасы даўжынёй больш за 1 метр. У прыватнасці, гаворка ідзе пра спецыяльна распрацаваныя «інтэлектуальныя аскепкава-фугасныя і тэрмабарычныя снарады з дыстанцыйным падрывам».
У дадатак да ўсяго гэтага расіяне чарговы раз пацвердзілі, што працуюць над стварэннем беспілотнай версіі танка Т-14.
Што кажуць спецыялісты
Вядомы даследчык бранятэхнікі Андрэй Тарасенка вельмі скептычна паставіўся да інфармацыі пра новую «Армату». Ён лічыць, што ідэя ператварэння танка ў зенітны комплекс сама па сабе абсурдная.
«Нейкая клініка ў стылі радара на «Арме», які бачыць спадарожнікі. Я думаў, што каб іх за гэтае жаласнае відовішча і п'янства не пасадзілі, яны будуць як мага радзей з'яўляцца на публіцы і згадваць пра «Арму», можа, людзі забудуцца, але не — яны будуць выдумляць нешта новае», — напісаў ён у сваім тэлеграм-канале.
Эксперт лічыць, што 152-мм гармата і «метровыя боепрыпасы» — гэта наратывы з мінулага, калі баявыя магчымасці танкаў спрабавалі ацэньваць па даўжыні снарадаў і калібру гарматы.
У сваю чаргу, спецыялісты ваенна-тэхнічнага партала Defense Express лічаць, што ўзровень гігантаманіі, які расійскія прапагандысты закладаюць у канцэпцыю мадэрнізацыі «Арматы», наглядна дэманструе непаразуменне таго, якую менавіта ролю танк павінен адыгрываць на полі бою ва ўмовах сучаснай вайны.