Беспілотнікі масіравана атакавалі Сочы: гараць устаноўкі СПА, нафтабаза і АЗС

• 4.09.2026, 7:37

У расійскім курортным горадзе некалькі ачагоў буйных пажараў.

Расійскі курортны горад Сочы ў Краснадарскім краі цягам усёй ночы падвяргаўся атакам беспілотнікаў. У сетцы паведамляюць пра шэраг трапленняў і ўзгаранняў у горадзе, паведамляе «Фокус».

У Сочы беспілотнікі, паводле папярэдніх даных, паразілі ўстаноўкі супрацьпаветранай абароны расіян, буйную нафтабазу і аўтазапраўчую станцыю (АЗС). Пра гэта паведамілі OSINT-аналітыкі са спасылкай на звесткі відавочцаў.

Атака на горад пачалася прыкладна а 00:30: мэр Сочы Андрэй Прашунін папярэджваў пра пагрозу прымянення беспілотнікаў у горадзе. На працягу наступных некалькіх гадзін, прынамсі да 05:00, у Сочы працягвалі чувацца выбухі і актыўна дзейнічала супрацьпаветраная абарона.

Спачатку OSINT-аналітыкі паведамілі каля 02:00 пра выбухі і другасную дэтанацыю ў Сочы. Паводле дапушчэнняў маніторынгавых каналаў, пад ударам магла апынуцца расійская зенітная ракетная сістэма вялікага і сярэдняга радыусу дзеяння «С-400». Аднак афіцыйных пацвярджэнняў пакуль няма.

Праз некаторы час аналітыкі паведамілі, што ў Сочы назіраецца яшчэ некалькі ачагоў узгаранняў. Як сцвярджаюць маніторынгавыя каналы са спасылкай на відавочцаў, беспілотнікі таксама паразілі буйную нафтабазу кампаніі «Лукойл», якая ўжо падвяргалася нападу каля года таму. На месцы ўспыхнуў моцны пажар.

Пазней у Аператыўным штабе Краснадарскага краю пацвердзілі напад на нафтабазу ў Сочы. Расійскія СМІ паведамляюць, што пажар на тэрыторыі аб’екта ўспыхнуў у выніку «масіраванай атакі беспілотнікаў» на горад. Ствярджаецца, што па стане на 05:00 пажар нібыта ўжо ўдалося ліквідаваць, хоць відавочцы пішуць пра адваротнае.

Акрамя таго, паводле даных OSINT-каналаў, у Сочы гэтай ноччу гарэла адна з мясцовых АЗС. Туды нібыта трапілі абломкі беспілотніка, што і стала прычынай узгарання.