Найбуйнейшы банк Беларусі ўводзіць абмежаванні па картках

• 4.09.2026, 16:02

Беларусам варта праверыць сваё мабільнае прыкладанне ўжо цяпер.

Кліенты Беларусбанка пачалі атрымліваць паведамленні пра ўвядзенне абмежаванняў па картках. Як гэта будзе працаваць на практыцы, растлумачылі ў афіцыйным Telegram-канале банка.

Навінка датычыцца тых, хто карыстаецца прыкладаннем M-Belarusbank і мае доступ не да ўласных картак.

«Сапраўды, карыстальнікі прыкладання мелі такую магчымасць. Гэта было зручна, каб дапамагаць сваякам распараджацца рахункам або весці сумесны бюджэт. Але дзеля прадухілення махлярскіх аперацый такой опцыі хутка больш не будзе», – растлумачылі ў Беларусбанку.

Да 1 кастрычніка трэба выдаліць не свае карткі. Калі гэтага не зрабіць, перастануць працаваць усе дададзеныя карткі (у тым ліку і ваша).

Для гэтага трэба зайсці ў прыкладанне і выканаць наступны алгарытм: «Карткі» → «Выбраць картку» → «Налады» → «Выдаліць картку».

Як далей дапамагаць сваякам

Каб не згубіць магчымасць далей дапамагаць сваякам, трэба аформіць дадатковую картку да рахунку іншага чалавека і зарэгістраваць яе ў прыкладанні.

«Такую картку можна аформіць у любым аддзяленні банка. Афармляе той, чый рахунак. Роднасныя сувязі не маюць значэння», – падкрэслілі ў Беларусбанку.

Калі картка будзе гатовая, яе можна дадаць у прыкладанне. І можна будзе далей карыстацца агульным рахункам або дапамагаць сваяку здзяйсняць фінансавыя аперацыі.