У аэрапорце Сочы пачаліся перабоі з запраўкай самалётаў

• 4.09.2026, 17:27

Гэта адбылося пасля атакі на нафтабазу.

У аэрапорце Сочы ўзніклі складанасці з запраўкай паветраных суднаў, авіяперавозчыкі пакуль вымушаныя карыстацца паслугамі толькі аднаго паліўнага аператара. Абмежаванні ўвялі пасля начной атакі дронаў на мясцовую нафтабазу. Пра гэта піша расійскае СМІ «Верстка».

Як пазначана ў авіяцыйным паведамленні NOTAM, цяпер запраўка ў аэрапорце ажыццяўляецца выключна «ЛУКОЙЛам».

«Запраўка ў аэрапорце Сочы ажыццяўляецца толькі паліўным аператарам ТАА «ЛУКОЙЛ» па тэхнічных прычынах; авіякампаніям неабходна пацвердзіць забеспячэнне запраўкі ў гэтага аператара», — гаворыцца ў NOTAM.

Паводле наяўных звестак, абмежаванне будзе дзейнічаць на працягу сутак — з сённяшняга дня, з 13:35 па маскоўскім часе, да 13:30 наступнага дня. Гэта распараджэнне замяніла папярэдняе, уведзенае раней у той жа дзень, у якім гаварылася пра поўную забарону запраўкі для ўсіх паліўных аператараў.

Акрамя дэфіцыту запраўных магутнасцяў, атака адбілася і на раскладзе рэйсаў. Як паведамілі ў Расавіяцыі, у мэтах забеспячэння бяспекі палётаў у аэрапорце Сочы часова абмежавалі прыём і выпуск самалётаў.

Губернатар рэгіёна Веніямін Кандрацьеў адзначыў, што ўзгаранне рэзервуараў можа істотна ўскладніць паліўную сітуацыю ў горадзе. У той жа час ён запэўніў, што бензін і дызельнае паліва пастаўляюцца ў дастатковай колькасці, хоць на асобных АЗС ужо фіксуюцца спробы штучна стварыць дэфіцыт.