Віцебскага футбаліста называюць двайніком Шагала

• 4.09.2026, 18:33

Цікава, што падабенства выявілася не толькі ў рысах твару.

Брамнік футбольнага клуба «Віцебск» Іван Новічкоў нечакана стаў аб'ектам увагі не толькі футбольных балельшчыкаў. Падчас фотасесіі новай формы каманды гараджане заўважылі яго дзіўнае падабенства з сусветна вядомым мастаком, родам з Віцебска, Маркам Шагалам, піша выданне «Віцьбічы».

Пасля з'яўлення ў сацыяльных сетках фатаграфій футбаліста каментатары пачалі параўноўваць яго з мастаком. Некаторыя нават жартавалі, што Новічкоў можа быць далёкім сваяком Шагала або што ў яго «перасялілася душа» знакамітага зямляка.

Цікава, што падабенства выявілася не толькі ў рысах твару. У Івана Новічкова такі ж рост, які, паводле ўспамінаў сучаснікаў, быў у маладога Марка Шагала.

Каб праверыць, наколькі моцнае гэтае падабенства, футбаліста запрасілі ў Віцебскі мастацкі музей, дзе цяпер экспануецца знакамітая карціна Шагала «Над горадам». Рэакцыя наведвальнікаў аказалася вельмі яскравай: многія не маглі паверыць уласным вачам, а некаторыя прапаноўвалі зрабіць Новічкова жывым сімвалам Віцебска і нават зняць яго ў ролі Шагала ў кіно.

Нягледзячы на вонкавае падабенства, сваяцтва паміж футбалістам і мастаком, праўда, не пацвердзілася. Іван распавёў, што паходзіць з самай звычайнай сям'і. Футболам ён пачаў займацца дзякуючы бацьку: спачатку іграў нападаючым, а пасля таго, як моцна вырас, перайшоў на пазіцыю брамніка.

Новічкоў пачынаў кар'еру ў Віцебску, затым выступаў на правах арэнды за гомельскі «Лакаматыў» і «Смаргонь», а цяпер зноў гуляе за родны клуб.

Сам футбаліст спачатку не паверыў у сваё падабенства з Шагалам, але з цягам часу ўсё часцей стаў чуць гэта ад навакольных. Пасля наведвання музея ён прызнаўся, што раней мала цікавіўся жывапісам, але цяпер хоча больш даведацца пра творчасць знакамітага зямляка. Сваё падабенства з мастаком Іван ацаніў у 7 балаў з 10.