«Пойдуць штурмаваць Крэмль з віламі»

• 4.09.2026, 19:53

Кіеў нанёс магутны ўдар па ладзе жыцця расійскай эліты.

Журналіст Іван Якавіна лічыць, што Украіна пачала ўводзіць у дзеянне план закрыцця неба над тэрыторыяй Расіі. Пра гэта аналітык напісаў у сваім Telegram-канале, каментуючы атаку беспілотнікаў на аэрапорт Сочы.

«Украіна пачала ўводзіць у дзеянне план закрыцця неба над Расіяй. Першым пад удар трапіў аэрапорт Адлер каля Сочы — там знішчана паліўнае сховішча. Немагчымасць хутка і бяспечна дабрацца з Масквы ў Сочы — гэта магутны ўдар па ладзе жыцця расійскай эліты і сярэдняга класа», — напісаў журналіст.

Разам з тым аглядальнік упэўнены, што сапраўдныя праблемы надыдуць для Крамля, калі пад удар трапяць рэйсы ў Дубай, якімі актыўна карыстаюцца «алігархі, тэмшчыкі, эскортніцы і крыптажулікі».

Паводле меркавання журналіста, у такім выпадку пералічаныя катэгорыі «з віламі, факеламі і аглоблямі наперавес самі пойдуць штурмаваць Крэмль».