Трамп: Уіткаф і Кушнер вязуць у Маскву прапанову спыніць вайну

• 4.09.2026, 22:11

Прэзідэнт ЗША заявіў, што «ёсць нядрэнны шанец».

Прэзідэнт ЗША Дональд Трамп у пятніцу, 4 верасня, заявіў, што яго спецпрадстаўнікі Стыў Уіткаф і Джарэд Кушнер вязуць у Маскву прапанову аб спыненні вайны, паведамляе Clash Report.

Падчас размовы Трампа з журналістамі ў Белым доме яму задалі пытанне, ці вязуць Уіткаф і Кушнер у Маскву новыя мірныя прапановы.

«Не, яны вязуць прапанову скончыць вайну. Бо я скончыў восем войнаў… і не атрымаў за гэта ніякай узнагароды. Дасталася мне Нобелеўская прэмія міру? Не», — адказаў Трамп, пасля чаго журналісты перайшлі да іншых пытанняў.

Пазней Трамп патлумачыў няздольнасць спыніць вайну РФ супраць Украіны тым, што прэзідэнт Украіны Уладзімір Зяленскі і расійскі дыктатар Уладзімір Пуцін «ненавідзяць адзін аднаго».

«Я накіраваў Уіткафа і Кушнера, двух выдатных перамоўцаў… каб паспрабаваць нешта зрабіць. І ёсць добры шанец, што гэта атрымаецца», — дадаў ён.