Беларусы дамагліся прызнання незаконнай схемы з платнымі паслугамі «Белтэлекама»
- 6.09.2026, 10:37
Але да рашэння МАРТ таксама ёсць пытанні.
МАРТ прызнаў, што «Белтэлекам» парушыў закон, падключаючы платныя паслугі без выразнай згоды абанентаў. У адказ на петыцыю беларусаў у ведамстве заявілі, што парушэнне ўжо ўхілена, але ці можна разлічваць на вяртанне спісаных грошай — не паведамілі, піша «Зеркало».
Беларусы стварылі на сайце «Зручны горад» петыцыю са скаргай на практыку, калі абанентам «Белтэлекама» рассылалі паведамленні пра падключэнне дадатковых платных паслуг, а адсутнасць адмовы фактычна лічылася згодай.
«Памер платы падабраны такім чынам, што яе спісанне практычна незаўважнае ў складзе штомесячнага плацяжу за паслугі сувязі, у выніку чаго аплата паслугі, пра падключэнне якой абанент не ведае, можа ажыццяўляцца неабмежавана доўга», — адзначылі аўтары звароту.
Яны папрасілі МАРТ дамагчыся «спынення практыкі падключэння абанентам РУП «Белтэлекам» платных паслуг на падставе маўчання» і вяртання раней спісаных за такія паслугі сродкаў.
У адказе ведамства прызнала, што такая схема парушае Закон «Аб абароне правоў спажыўцоў» і Правілы аказання паслуг электрасувязі № 1055.
Паводле звестак МАРТ, падобныя паведамленні ў чэрвені—жніўні 2026 года рассылалі два філіялы «Белтэлекама». Пасля гэтага абанентаў абзванілі, а тым, хто не згадзіўся на паслугу, яе адключылі.
У міністэрстве палічылі парушэнне ўхіленым:
«У сувязі з тым, што тэксты паведамленняў змяшчалі часткова некарэктную інфармацыю, РУП «Белтэлекам» праведзена праца па ўстараненні парушэнняў, прынятыя адпаведныя меры рэагавання ў дачыненні да адказных супрацоўнікаў, праведзена дадатковае навучанне работнікаў і тлумачэнне нормаў заканадаўства», — гаворыцца ў адказе ведамства.
Аднак пра вяртанне грошай, якія маглі быць спісаныя за ўжо падключаныя паслугі, там нічога не гаворыцца. Не паведамляецца і пра суцэльную праверку асабовых рахункаў або падпісак, падключаных да чэрвеня 2026 года.
«Галоўнае дасягнута: МАРТ наўпрост назваў маўклівае падключэнне платных паслуг парушэннем закона», — пракаментаваў юрыст партала «Зручны горад».
У той жа час засталіся пытанні да новага парадку, які выкарыстоўвае аператар: цяпер згоду абанента прапануюць атрымліваць падчас тэлефоннага званка з запісам размовы. Аднак такі спосаб, як сцвярджае юрыст, не ўваходзіць у закрыты пералік варыянтаў згоды, прадугледжаны пунктам 9 Правілаў № 1055.
Нагадаем, у пачатку жніўня беларусы паскардзіліся на рассылкі «Белтэлекама» з прапановай падключыць дадатковыя паслугі: калі кліент не паведамляў пра адмову, падпіску маглі актываваць аўтаматычна. Так, адна з карыстальніц сацсетак распавядала, што яе сваячцы-пенсіянерцы прыйшоў заказны ліст з прапановай паслугі «Премьер», прычым для адмовы трэба было самастойна звязацца з кампаніяй.
У «Белтэлекаме» тады заявілі, што гаворка ідзе пра бясплатныя прамаперыяды, якія дазваляюць паспрабаваць новыя сэрвісы, а рашэнне аб далейшым платным выкарыстанні «заўсёды за абанентам». У кампаніі сцвярджалі, што пасля заканчэння бясплатнага перыяду аператар абавязкова звязваецца з кліентам і ўдакладняе, ці хоча той працягваць карыстацца паслугай.