У Белгарадзе паўсталі супраць партыі Крамля

• 6.09.2026, 12:34

«Адзіную Расію» патрабуюць зняць з выбараў.

Напярэдадні парламенцкіх выбараў у расійскім Белгарадзе ўзнік міні-бунт. Мясцовыя жыхары запісалі відэазварот з патрабаваннем зняць з галасавання кіроўную партыю «Адзіная Расія», створаную Уладзімірам Пуціным. Пра гэта паведамляе Dialog.UA.

Расіяне выступілі з антываеннай заявай, адзначыўшы, што ім ужо надакучыла бясконцая «СВА».

«Знялі (з выбараў у Дзярждуму — рэд.) партыю «Яблык», якая была цалкам за мір. Мы жывём у прыгранічнай вобласці, у Белгарадзе. І нам гэтая вайна ўжо вось так надакучыла! Мы хочам міру. Мы размаўляем з людзьмі — усе яго хочуць. Усе жывуць у стрэсе, у апатыі. Мы напісалі заявы і заклікаем народ удзельнічаць… Калі прыбралі тую (партыю — рэд.), якая за мір, то мы маем права прыбраць усе астатнія партыі! Мы хочам міру! Партыя «Адзіная Расія» — гэта партыя вайны, голаду і галечы для народа, смерцяў і забойстваў. Нам такое не трэба! (…) Мы за тое, каб яе знялі з выбараў і прыбралі як нягодную і непатрэбную для нашых розумаў, якая разбурае нашу краіну», — гаворыцца ў заяве белгарадцаў.