Лаўроў заявіў, што Германія пачала «сапраўдную вайну» з Расіяй
- 6.09.2026, 15:37
Прычына — расійскі дрон у аэрапорце Лейпцыга.
Дзеянні Германіі ў адносінах да Расіі пасля выяўлення замініраванага дрона ў аэрапорце горада Лейпцыг можна лічыць пачаткам «сапраўднай вайны», заявіў кіраўнік МЗС РФ Сяргей Лаўроў. «Лейпцыг, аэрапорт… Знайшлі нейкі там дрон. Сказалі, гэта расійскі дрон, ніхто не стаў разбірацца. Гэта, увогуле, па вялікім рахунку, пачатак такой сапраўднай вайны», — сказаў кіраўнік ведамства ў інтэрв’ю прапагандысту Павалу Зарубіну (цытата паводле «Інтэрфакса»). На пачатку жніўня ў аэрапорце Лейпцыг/Гале выявілі некалькі дронаў з выбухоўкай: адзін — побач з украінскім ваенна-транспартным самалётам, а другі — непадалёк ад аэрапорта.
Кіраўнік МУС Германіі Аляксандр Добрындт заяўляў, што выканаўцы «гібрыднай атакі» дзейнічалі па замове расійскіх дзяржаўных структур. Пасля гэтага ўлады ФРГ прынялі рашэнне закрыць генеральнае консульства РФ у Боне і Рускі дом у Берліне, а таксама ужорстчыць кантроль за расіянамі, якія прыбываюць у краіну. Лаўроў пракаментаваў гэтыя дзеянні Берліна: «Я памятаю, што перад пачаткам Другой сусветнай вайны, Вялікай Айчыннай вайны, дакладней, немцы таксама свае дыпламатычныя місіі закрывалі». Таксама міністр заявіў, што канцлер Германіі Фрыдрых Мерц «ідзе, ну, па сутнасці, абвяшчаць нам вайну».
«Аказалася, што вось гэтыя метастазы нацызму пачынаюць прабівацца. Гэта небяспечная з’ява. Мне здаецца, расійскае кіраўніцтва зробіць адпаведныя высновы», — падкрэсліў Лаўроў.
Раней Добрындт заявіў, што ўлады ФРГ рыхтуюць комплексны план супрацьдзеяння расійскім гібрыдным атакам. Паводле яго слоў, план уключае аператыўнае размяшчэнне ў дзевяці стратэгічна важных гарадах Германіі спецыяльных падраздзяленняў федэральнай паліцыі па барацьбе з дронамі. Яны возьмуць пад ахову аэрапорты, вакзалы, урадавы квартал у Берліне і іншыя крытычныя аб’екты, а таксама змогуць размініраваць БПЛА з выбухоўкай.
Таксама плануецца надаць аб’ектам крытычнай інфраструктуры права самастойна абясшкоджваць дроны, пашырыць выкарыстанне сістэм ШІ, а таксама распазнавання твараў і сістэм відэаназірання для пошуку зламыснікаў, зброі і патэнцыйна небяспечных паводзінаў. Акрамя таго, прапрацоўваецца канцэпцыя стварэння нацыянальнага «кіберкуполу».