Беларусь зноў пацярпела ад непагадзі

• 6.09.2026, 16:04

Падалі дрэвы, зрывала дахі.

Цыклон «Вілья» прынёс у Беларусь небяспечную непагадзь — Белгідрамет нават абвясціў аранжавы ўзровень небяспекі.

Парывы ветру месцамі дасягалі 24 м/с.

Наступствы непагадзі давялося ліквідаваць супрацоўнікам МНС, паведамілі ў прэс-службе ведамства.

Згодна са зводкамі МНС, «Вілья» прайшоўся амаль па ўсіх рэгіёнах краіны — у спісе пацярпелых абласцей не было толькі Брэсцкай.

«Паводле аператыўнай інфармацыі, падраздзяленні МНС аказвалі дапамогу ў Гродзенскай, Гомельскай, Віцебскай, Магілёўскай, Мінскай абласцях і Мінску», — паведамілі ў МНС.

Найчасцей дапамога выратавальнікаў патрабавалася ў сталіцы. Тут супрацоўнікі МНС выязджалі на выклікі праз непагадзь 14 разоў.

Дапамога патрабавалася як звычайным людзям, так і арганізацыям.

«Дзевяць разоў — для распілоўвання аварыйных і паваленых дрэў, тры разы — для дэмантажу жэсці з дахаў будынкаў і збудаванняў, адзін раз — для дэмантажу аварыйнай металічнай канструкцыі з фасада жылога дома, адзін раз — для зняцця адарванай часткі рэкламнага плаката з білборда», — заўважылі ў ведамстве.

Акрамя таго, «Вілья» пашкодзіў і адзін легкавы аўтамабіль.

Сем выездаў выратавальнікаў спатрэбілася ў Магілёўскай вобласці. Тут пераважна трэба было прыбраць паваленыя ветрам дрэвы. Такая дапамога была патрэбная жыхарам Горак, Краснапольля, Чавускага, Шклоўскага, Слаўгарадскага і Магілёўскага раёнаў.

Дасталося і Віцебшчыне. Тут выратавальнікаў прасілі дапамагчы ў прыбіранні дрэў шэсць разоў: двойчы ў Аршанскім раёне, тройчы ў Віцебскім і адзін раз у Докшыцкім.

У Гродзенскай вобласці ў МНС званілі пераважна з-за дрэў, што ўпалі на праезную частку. Такое адбылося ў чатырох раёнах вобласці: Гродзенскім, Воранаўскім, Дзятлаўскім і Смаргонскім, а таксама ў Гродне.

«У абласным цэнтры выратавальнікі двойчы аказвалі дапамогу ў зняцці дэфармаваных лістоў жэсці: з даху неэксплуатуемай ваданапорнай вежы і балкона шматкватэрнага жылога дома», — адрапартавалі ў МНС.

Менш за іншых, згодна са зводкамі выратавальнага ведамства, дасталося Міншчыне і Гомельшчыне. Тут з-за непагадзі МНС выклікалі па адным разе — усё праз дрэвы. У Мінскай вобласці прыбіралі паваленае дрэва ў Барысаве, а ў Гомельскай — у вёсцы Асоўцы.

Паводле аператыўных дадзеных, пацярпелых ад непагадзі няма. Але расслабляцца рана — цыклон яшчэ бушуе, таму выратавальнікі працягваюць манітораваць абстаноўку.