Расія рыхтуе схаваную мабілізацыю: каго хочуць прызваць у армію

• 8.09.2026, 8:55

Новыя правілы ўступяць у сілу пасля так званых «выбараў» у Дзярждуму.

Краіна-агрэсар Расія рыхтуе новыя змены, накіраваныя на схаванае папаўненне шэрагаў арміі, і плануе адпраўляць на службу грамадзян з цяжкімі захворваннямі. Пра гэта паведамляе партызанскі рух «Атэш».

Адзначаецца, што расійскія ўлады «дазволяць» заключаць кантракты для працы ў тылавых падраздзяленнях свайго рэгіёна «дабраахвотнікам» з катэгорыяй здароўя «Д». Да яе адносяцца абсалютна непрыдатныя да службы з-за найцяжэйшых паталогій, у прыватнасці анкалогіі, ВІЧ, цяжкіх псіхічных засмучэнняў і інваліднасці.

Партызаны кажуць, што новыя правілы ўступяць у сілу пасля правядзення расійскіх псеўдавыбараў у Дзярждуму, якія павінны адбыцца ўжо ў гэтым месяцы.

«Зразумела, што за фармулёўкай пра «дабраахвотнікаў» хаваецца банальны разлік: людзьмі з інваліднасцю закрыюць пазіцыі ў тыле, а больш-менш здаровых вайскоўцаў, якія трымалі гэтыя месцы, адправяць у штурмавыя брыгады», — заявілі ў «Атэш».

Яны дадалі, што такі крок фактычна пазбавіць грамадзян апошняй магчымасці законна пазбегнуць прызыву па стане здароўя.

Акрамя таго, у руху падкрэслілі, што Крэмль дагэтуль баіцца абвясціць паўнавартасную мабілізацыю, таму выжыдае заканчэння так званай «выбарчай кампаніі» і звяртаецца да ўлоўкаў.

«Добраахвотнае падпісанне кантракта пад ціскам і маніпуляцыямі ператворыцца ў масавую практыку, што дазволіць без лішняга шуму набраць сотні тысяч новых адзінак асабовага складу», — падкрэслілі партызаны.

У «Атэш» заклікалі медыцынскіх работнікаў, супрацоўнікаў ваенкаматоў і мясцовых адміністрацый не ўдзельнічаць у чарговым злачынстве Крэмля.