Трагікамічны эпізод са сустрэчы Лукашэнкі і галоўнага «палаточніка»

• Андрэй Карась, «Салідарнасць»
• 8.09.2026, 9:50

Дыктатар перайшоў да куды больш цікавай для сябе тэмы.

У панядзелак, 7 верасня, кіраўнік Беларусі прыняў у сябе з дакладам старшыню «палаты прадстаўнікоў» Ігара Сяргеенкі. Падчас іх размовы адбыўся адначасова і смешны, і сумны эпізод.

Заявіўшы, што ў працы парламента «нейкіх асаблівых насцярожанасцяў» ён не бачыць, Лукашэнка перайшоў да куды больш цікавай для сябе тэмы:

— Вы шмат займаецеся разам з Наталляй Іванаўнай Качанавай Віцебскай вобласцю. Я інфармаваны, што ў вас ёсць калгас, адказныя за гэта і вы, і яна таксама. Гэта вельмі правільна. Фінансава дапаможаце, не дапаможаце — гэта пытанне не галоўнае. Але тое, што вы бачыце праблему і можаце своечасова падналадзіць, адрэгуляваць тое, што трэба, — гэта дакладна… Для мяне гэты досвед цікавы. Запрасіце, я з задавальненнем хацеў бы пабываць у вашай гаспадарцы, якую вы курыруеце.

Калі хто не ведаў, старшыня ніжняй палаты парламента цяпер ратуе калгас пад назвай ААТ «Княж» у адным з найбольш дэпрэсіўных рэгіёнаў краіны — у Шаркаўшчынскім раёне.

Выйшаўшы пасля дакладу кіраўніку, Сяргеенка даў справаздачу перад прадстаўнікамі дзяржСМІ:

— «Прэзідэнта» цікавілі мае асабістыя падыходы да гаспадаркі, якую мне было даручана ўзяць у асабістае куратарства. Я і мае калегі актыўна ўключыліся ў гэтую працу. Не толькі бываючы там, але і аказваючы канкрэтную дапамогу па ўмацаванні матэрыяльна-тэхнічнай базы, адраджэнні земляў, навядзенні элементарнага парадку на землях. Спадзяюся, што на працягу двух гадоў мы прынцыпова зменім сітуацыю.

Паказальна, што Лукашэнка і Сяргеенка нават не спрабавалі зрабіць выгляд, што ў сучаснай Беларусі «парламент» адыгрывае якуюсьці ролю (як і яго «старшыня»). А ў дэмакратычных краінах гэта незалежная галіна ўлады.

Старшыня ніжняй «палаты парламента» не саромеецца прызнацца, што занепакоены не прыняццем неабходных для грамадства законаў, а ўсяго толькі адным з сотняў стратных калгасаў.

Андрэй Карась, «Салідарнасць»