На мяжы Беларусі з Польшчай зафіксавалі рэкордны ўсплёск нелегалаў

• 8.09.2026, 15:51

За некалькі дзён адбылося больш за 50 спроб прарыву

За апошнія некалькі дзён польскія памежнікі зафіксавалі больш за 50 спроб незаконнага перасячэння мяжы з боку Беларусі. Гэта самы высокі паказчык за такі кароткі перыяд з пачатку 2026 года.

Пра гэта паведаміла Памежная служба Польшчы.

Усе спробы былі зафіксаваныя на ўчастку, які ахоўвае памежная застава ў Нарэўцы ў Падляскім ваяводстве.

Большасць замежнікаў пры з'яўленні польскіх памежнікаў адступілі ўглыб тэрыторыі Беларусі. Тых, каму ўдалося апынуцца на польскім баку, затрымалі.

Для параўнання, 10–12 ліпеня польскія памежнікі зафіксавалі 37 спроб незаконнага пераходу мяжы, а з 7 па 12 жніўня — больш за 40. Такім чынам, цяперашні ўсплёск стаў найбуйнейшым за некалькі дзён з пачатку года.

Усяго з пачатку 2026 года на ўчастку адказнасці Падляскага аддзела Памежнай службы Польшчы зафіксавана ўжо больш за 410 спроб незаконна трапіць у краіну з боку Беларусі.

У Памежнай службе падкрэсліваюць, што ўсе зафіксаваныя сёлета спробы незаконнага перасячэння польска-беларускай мяжы былі спыненыя.