Расія раптоўна адмяніла выпрабаванне ракеты «Авангард»

• 8.09.2026, 16:26

Магчымы пуск быў адменены па невядомай прычыне.

Расія, верагодна, рыхтавалася да выпрабавання гіпергукавога комплексу «Авангард», аднак пуск быў адменены. Выпрабаванне павінна было стаць першым з 2018 года.

Пра гэта ў аўторак, 8 верасня, піша выданне The Insider, абапіраючыся на высновы эксперта па расійскіх стратэгічных ядзерных сілах Паўла Падвіга.

Як паведамляецца, Падвіг, прааналізаваўшы, у прыватнасці, выпушчаныя перад меркаваным пускам авіяцыйныя папярэджанні і паведамленні мясцовых уладаў, прыйшоў да высновы, што падрыхтоўка вялася да выпрабавання менавіта «Авангарда», а не іншай расійскай міжкантынентальнай ракеты — «Сармат».

Выпрабаванне планавалася правесці з 3 па 5 верасня. Міжкантынентальную балістычную ракету УР-100Н УТТХ з гіпергукавым плануючым блокам «Авангард» мусілі запусціць з раёна Дамбароўскага/Яснага ў Арынбургскай вобласці РФ у кірунку палігона Кура на Камчатцы, лічыць эксперт.

Магчымы пуск быў адменены па невядомай прычыне, аднак прыкметаў аварыі падчас запуску няма.

Публічна пра падрыхтоўку ці адмену выпрабавання расійскія ўлады не паведамлялі.